Mandag morgon starta legar i Trondheim å vaksinere folk som er i risikogruppa for å bli alvorleg sjuk av svineinfluensaen.
– Nokon som kjem hit er engstelege og blir frustrert fordi dei må vente, spesielt fordi datoen for når kommunen skal starte massevaksinering ikkje er klar. Så vidt eg forstår, blir det ikkje før etter 16. november, seier Sylvi Torvund, som er lege ved Nardosletta legekontor, til NRK Trøndelag.
Ekstra møblar
Ho opplevde i morgontimane eit rush av pasientar som ville vaksinere seg mot svineinfluensaen.
Så mange kom, at det måtte berast inn ekstra plaststolar for at alle skulle få sitte på legekontoret.
– Vi bruker rundt fem minutt på sjølve vaksinen, men alle må sitte her 20-30 minutt etterpå. Så det er masse folk som sit og ventar, for viss dei reagerer på vaksinen skal det skje hos oss og ikkje heime, seier Torvund.
Manglar oversikt
Fleire legekontor i Trondheim manglar oversikt over kven som er i risikogruppa for å få svineinfluensaen.
- Det er uheldig. Då er vi ikkje sikre på at ein prioriterer godt nok i den situasjonen vi er oppe i no, seier kommuneoverlege Helge Garåsen til NRK Trøndelag.