– Vi innser at vi er ein del av problemet, og vil derfor prøve å vere ein del av løysinga. Dagens løysingar innan transport inneber utslepp, og det vil vi gjere noko med.
John Eckhoff, pressesjef i Posten Norge, fortel at det er god økonomi i den nye terminalen som no blir klargjort i Trondheim, då dei vil ende opp med å spare mykje pengar. Den nye terminalen skal med hjelp frå solcellepanel og ei vindmølle sørgje for energi til cirka 75 el-køyretøy. I tillegg skal det vere sjølvdrivne lyktestolpar, og vindturbinar som skal skape energi nok til dei tilsette sine el-syklar. Den totale summen for bygget hamna på 500 millionar kroner.
– Må satse på miljøeffektivitet
– Posten Norge har mange miljøsatsingar, og vi brukar fleire milliardar på nye terminalar landet over. Bygget i Trondheim vil ha offisiell opning 15. september, og totaliteten av miljøeffektive løysingar i denne terminalen er foreløpig eineståande.
Eckhoff meiner dette er den riktige retninga å gå i, og legger til at alle verksemder må satse på miljøeffektivitet. Han peikar særskild på transport- og logistikkbransjen. Den nye terminalen vil finne stad på Torgård, sør for Trondheim sentrum. Konsernsjef i Posten Norge, Tone Wille, fortel at miljøperspektivet har vore førande heilt sidan dei starta å planlegge den nye terminalen.
– Samarbeid med blant anna Enova har gitt oss moglegheita til å satse på innovative løysingar som gjer dette til Europa sin mest miljøvennlege terminal, seier Wille.
Mål om å bli lavutsleppsamfunn
Det statlege føretaket Enova har støtta prosjektet med 14,2 millionar kroner, og dei meiner den nye terminalen vil bli eit eksempel til etterfølging.
– Det er eit ambisiøst prosjekt som det er ein fryd å få vere med å realisere. I lavutsleppsamfunnet må norske bygg både vere meir energieffektive og belaste energisystemet mindre, forklarar Nils Kristian Nakstad, administrerande direktør i Enova.
Enova sitt oppdrag er å vere pådrivar for lavutsleppsamfunnet, og Eckhoff er svært glad for å ha dei med på laget.
–Dei hjelper oss med utgiftene, men det viktigaste er at dei har mykje kompetanse på området, forklarar han.