Ingebrigtsen er ikkje smålåten på vegner av den nye mannen Christian Gytkjær, som no får hovudansvaret for å sørgje for at Rosenborg held fram med å finne nettmaskane ofte, også etter at fjorårets toppscorar Aleksander Søderlund har fått ny arbeidsgjevar i Frankrike.
Meiner RBK blir betre enn i fjor
Trenaren som altså rakk å gjere seg så populær i Trøndelag på ein sesong som Rosenborg-trenar, at han danka ut alle andre kandidatar til tittelen Årets Trønder, er ikkje redd for at det no kan bli verre å gjenta ein suksess, enn å skape ein.
Han trur ikkje saknet av Søderlund og det alt geniforklåra midtbaneankeret Ole Selnes, skal ha svekka trønder-laget for mykje. Tvert om trur Ingebrigtsen at laget er enno betre denne sesongen enn i fjor.
Har møtt sterkare motstand i oppkøyringa
Til NRK viser han til at spelet har vore bra mot sterke motstandarar i oppkøyringa.
– Vi har møtt langt betre motstand enn vi gjorde i fjor. I dei fleste kampane har vi vore best. Mot FC København var det vel sånn 50–50. Men vi er fullt på høgde med dei, og dei seier dei er gode nok til å spele Champions League, så dei får håpe dei slepp å trekke oss, smiler Rosenborg-trenaren.
Han lovar eit Rosenborg der alle spelarane er svoltne på meir suksess.
– Det har vi sett på treningane, annonserer han som styrer RBK-skuta.
Det står alltid fram nye spelarar når dei blir gitt ei sjanse:
– Nokre som ikkje fekk spele like mykje i fjor haust, har lyst til å spele meir. Vi er betre rusta no enn vi var i fjor, summerer opp Ingebrigtsen sine førebuingar.
Må bli minst tjue treff på nyspissen
Den nye spissen hadde han hatt i kikkerten lenge, da Gytkjær vart det nye spissvalet. At dansken med fortid i Haugesund ikkje har var vore så ofte på scoringslista til no i treningskampane, uroar ikkje trenaren. Mål vil det bli mange av når alvoret kjem i gang:
– Han får over tjue i år.
– Er du heilt sikker på det?
– Sikker? Dersom vi skapar like mange målsjansar som vi gjorde i fjor, så endar han på over 20, trur Ingebrigtsen.