Aldri før er fleire blitt registrert smitta av covid-19 i Trondheim. Pågangen til kommunen har vore enorm. Helse- og velferdsdirektør Wenche Dehli, fortel at koronatelefonen fekk 500 samtaler på dei første ti minutta fredag morgon.
Trondheim kommune heldt pressekonferanse fredag ettermiddag.
113 nye personar er smitta av koronavirus siste døgn. I tillegg er det meldt inn cirka 100 positive hurtigtestar som no skal følgast opp med PCR-test.
88 av dei smitta i Trondheim er mellom 20 og 29 år. Mange av dei smitta er studentar.
Pressekonferansen handla om testing og smittesporing og andre tiltak og løysningar for å slå ned det omfattande smitteutbrotet i Trondheim.
– Eit enormt press
Kommunen har store utfordringar med kapasitet for testing, smittesporing og isolasjonshotell, men jobbar med å skalere opp kapasiteten.
– Det har vore eit enormt press på dei som jobbar med testing, smittesporing og liknande, seier helse- og velferdsdirektør Wenche Dehli.
Teststasjonane jobbar no med doble skift. Kommunen vil også auke testkapasiteten sin med minst 500 testar dagleg i neste veke, opplyser ho.
Det er framleis svært stor pågang på koronatelefonen.
– Vi fekk fem hundre innringingar til koronatelefonen dei første ti minutta den var open i dag, seier Dehli.
Alle som fekk positiv PCR-test i går skal ha fått ein SMS frå kommunen om kva dei skal gjere no som dei er smitta.
Kommunen ønskjer at dei som har testa positivt på ein hurtigtest sender e-post til dei på denne adressa.
Vil gje folk PCR-test heime
– Frå neste veke vil det bli moglegheit for at befolkninga kan ta i bruk heimetesting med PCR-testar, seier Elizabeth Kimbell.
PCR-testar er dei ordinære og meir presise testane, som ein vanlegvis må ta på ein teststasjon for å kome seg ut av karantene eller for å bli registrert som smitta i den offisielle koronastatistikken.
Informasjon om korleis dette vil fungere kjem på kommunen sine heimesider når ordninga er klar.
– Vil tilbyr no også massetesting av studentar med hurtigtestar. Vi førebur oss på å finne mange nye smitta i dagane framover også, seier Kimbell.
– Vi prioriterer no testing framfor smittesporing etter råd frå FHI.
KLIPP: Elizabeth Kimbell fortel at Trondheim kommune vil la folk ta PCR-testar heime.
Flytter studentar inn på isolasjonshotell
Kommunen har no fått på plass 160 isolasjonsrom og er i ferd med å flytte dei smitta studentane som treng det over på hotellrom.
– Vi vil også etablere eit kontaktpunkt som lettare vil fikse skyss og hotellrom til dei som treng det.
– Dette kjem det meir informasjon om på kommunen sine nettsider når ordninga er på plass, seier helse- og velferdsdirektør Wenche Dehli.
– Dette ansvaret har vi alle
Kommunedirektør Morten Wolden meiner forskrifta formannskapet innført i går er i tråd med anbefalingane frå FHI og Helsedirektoratet.
Då fekk folk i Trondheim mellom anna beskjed om å finne fram munnbindet. Dei må no også registrere seg i restaurantar og barar, og helst jobbe heimanfrå om dei treng å ta bussen til jobb.
– Dei anbefaler også massetesting, det har vi allereie gjort i studentmiljøet og det skal vi gjer igjen, vi planlegg å teste 35.000 studentar i løpet av få dagar, seier Wolden.
– Det er utruleg viktig at vi handterer dette godt no. Det hjelper ikkje å peike på ungdommane og studentane, dette ansvaret har vi alle, berre saman kan vi unngå ytterlegare nedstengingar av byen, avsluttar han.
