Skredet har gått tidlegare, melder politiet på Twitter kl. 18.08.
Ein luftambulanse har gjort eit overflatesøk, og det såg ikkje ut til at snøskuterspora var ferske.
Politiet: – Ingenting som tyder på spor i skreda
Meldaren sa til politiet at det går skuterspor inn i skredet. Vedkommande har stått og observert med ein kikkert.
Ifølge politiet er ingen meldt sakna.
Snøskredet skal ha gått i området Heggvollbotten i Oppdal.
– Luftambulansen har sjekka ut fleire sked som har gått i same område. Det er ingenting som tyder på spor inn i desse skreda, skriv politiet i Trøndelag på Twitter kl. 18.14.
– Normalt med skred i området
– Vi har fått melding om eit skred som har gått i eit område vest for E6. Det er eit veldig bratt terreng, så det er normalt at det kan gå skred i området. Spesielt no for tida.
Det opplyser operasjonsleiar Anne Birgitte Arras i Trøndelag politidistrikt til NRK.
Politiet varsla om hendinga kl. 17.39.
Like etter klokka 18 tvitrar dei at det er «STOR fare for at fleire skred vil gå i området i dagane som kjem» på grunn av snøsmelting.
Naudetatar på staden
Politi og luftambulanse er på staden. Hovudredningssentralen er også involvert.
Politiet ber om at personar i området med kjennskap til skredet, varslar politiet på 02800.