Nysgjerrige ungar går sakte forbi i foajeen på kvinne-barn-senteret på St. Olavs Hospital i Trondheim.
Dei ser ein mann som er i full gang med å fylle ein stor vegg med eit fargerikt maleri.
Det er Øystein Dolmen, som saman med Gustav Lorentzen utgjorde duoen Knutsen & Ludvigsen. Han illustrerte omslaga på platene dei gav ut på 70- og 80-talet, og får no male på veggane på sjukehuset.
– Dette har vore ein stor draum heilt sidan eg var liten og begynte å rable på veggane ute, seier Dolmen.
– Den gongen fekk eg kjeft, juling – eller vart jaga vekk. No får eg lov til å stå her og rable så mykje eg vil. Og så får eg betaling!
Det er kjente figurar frå Knutsen & Ludvigsens univers, og dei er fargerike og glade.
– Når du er på sjukehuset, er det viktig å sjå noko som muntrar deg opp, meiner Hildegunn Kjerringvåg, som er spesialpedagog på St. Olavs Hospital.