Ingen nye tiltak i Trondheim trass kraftig smitteauke

Kommunedirektør Morten Wolden, ordførar Rita Ottervik, kommuneoverlege Tove Røsstad og Lasse Arntsen, oppvekst- og utdanningsdirektør i Trondheim kommune er til stades.

– Vi har dessverre hatt ei kraftig smitteauke i Trondheim den siste veka, opnar kommunedirektør Morten Wolden.

Kan innføre tiltak komande tysdag

Formannskapet i Trondheim kommune vil ta stilling til om dei skal innføre strengare smittevernreglar på tysdag.

– Om det viser seg at det ikkje går i den retninga vi ønskjer, er vi førebudde på å sette i verk meir inngripande tiltak enn vi har i dag, seier Ottervik.

Anbefaling om bruk av munnbind og færre nærkontaktar har hatt liten effekt. Kommunen held likevel fram med anbefalingar dei to-tre komande dagane for å sjå om folk følgjer råda.

– Viss ikkje må vi anbefale formannskapet at det blir i sett i verk kraftigare tiltak, seier kommunedirektør Wolden.

• Sjå pressekonferansen her:

Pressa sjukehus og mykje smitte blant barn

Kommunen er bekymra for mykje smitte på skular og at helsevesenet er sterkt pressa.

– Planlagde operasjonar på sjukehuset må vente, det er alvorleg. Vi kan ikkje sette oss i ein situasjon der smitten får ta over og helsetenestene våre blir endå meir pressa og går ned seier kommunedirektøren.

– I den kraftige smitteauken vi har hatt den siste veke utgjer barn og unge 60 prosent. Dei unge vaksne, mellom 18 og 30, dei med utstrekt sosial kontakt utgjer åtte prosent, medan resten over 31 år utgjer 27 prosent, seier kommuneoverlege Røsstad.

– Det aller viktigaste rådet no er: Hald dykk heime når de er sjuke, seier Wolden.

Oppmoda folk til å vaksinere seg

90 prosent av vaksne i Trondheim er no fullvaksinerte.

Kommuneoverlegen oppmoda dei som ikkje har vaksinert seg om å gjere det no.

– Vaksinasjonen har svært god effekt. Dei som er vaksinert siste halvår blir i liten grad smitta. Dei som blei vaksinert tidleg på året, eldre og helsepersonell blir i noko auka grad smitta og dei får som regel ikkje veldig alvorleg sjukdom, seier ho.

– Covid-19 kjem til å vere med oss, igjen og igjen, understreka Røsstad.

Røsstad bad folk som har vore nærkontaktar med smitta om å unngå fritidsaktivitetar i ti dagar og oppmoda arbeidsgjevarar til å legge til rette for heimekontor.

Meiner gjenopningsfesten ikkje har gitt meir smitte

Det har vore stor sosial aktivitet i Trondheim den siste tida med ein tre veker lang opningsfest og studentveka, kurs og konferansar.

– Det er ikkje aktuelt å sette inn tiltak mot kino, teater, kurs og konferanse så lenge situasjonen er som den er no, seier Wolden og held fram:

– Hovudbodskapen er at vi held fram med anbefalingane og håper dei verkar. Vi jobbar samstundes med ei politisk sak, som tek høgde for å sette i verk sterkare målretta tiltak inkludert ein tydeleg opptrappingsplan som formannskapet kan ta stilling til på tysdag.

209 registrert smitta torsdag

209 personar vart registrert koronasmitta i Trondheim torsdag, skriv Trondheim kommune i ei pressemelding.

Til samanlikning vart det på det meste registrert 138 personar i byen på måndag førre veke. Resten av førre veke var smittetala på under hundre personar dagleg, ifølgje kommunen sin statistikk.

Over halvparten av dei smitta i Trondheim i går er under 20 år.

11 koronapasientar er innlagde på St. Olavs hospital no. To av dei får behandling på intensivavdelinga, og ein av desse to får pustehjelp med respirator.

Sidan tysdag har over 100 personar blitt registrert smitta dagleg i byen.

Auke i smitte fleire stader

Smittetala aukar også i Tromsø, der det torsdag vart registrert 101 personar som testa positivt for koronavirus.

Det er det høgste talet på ein dag nokon gong. 487 testar vart gjennomført. 22 koronapasientar er no lagt inn på UNN.

Nasjonalt vart det registrert 1534 koronasmitta personar på torsdag. Det er 538 fleire enn same dag i førre veke.

Dei siste sju dagane er det i snitt registrert 1222 koronasmitta per dag. Tilsvarande snitt for sju dagar sidan låg på 831.

Torsdag var 171 koronapasientar innlagt på sjukehus. Det var fire fleire enn dagen før.