NRK Meny
Normal

Hjelper rusmisbrukarane i helgene

Trondheim er storbyen i Noreg med færrast overdosar. Dei siste tre åra har rusmisbrukarane fått medisinsk hjelp også i helgene. Dette er ei ordning som byen er åleine om – og som kan ha redda mange liv.

Created by InfoDispatcher

Skadereduksjonsgruppa deler ut medisin til rusavhengige, på oppdrag frå legemiddelassistert rehabilitering (LAR).

På kvardagar må dei rusavhengige møte opp på kontoret i Trondheim sentrum for å få utlevert legemidla, men i helgene kjører dei tilsette ut til brukarane av tilbodet.

Desse heimebesøka skal førebyggje overdosar blant rusmisbrukarane i byen.

Kjenner kvarandre godt

Lene Heimstad

Lene Heimstad er sjukepleiar i skadereduksjonsteamet.

Foto: NRK Trøndelag

– Det er veldig viktig at det er dei fast tilsette som kjem også i helgene. Det er tryggare for brukarane at dei får besøk av folk dei har ein relasjon til frå før, seier Lene Heimstad, som er sjukepleiar i skadereduksjonsgruppa i Trondheim kommune.

På dette viset slepp dei å forklare historia si til nye folk heile tida.

– Vi veit kva dei strever med, og kan hjelpe dei betre, fordi vi kjenner dei så godt, seier Heimstad.

Berre positive tilbakemeldingar

Trondheim er den einaste staden i landet som har ei slik ordning. Overdoseteamet i byen trur helgebesøka reddar mange liv.

– Dei som er rusavhengige og brukar dette tilbodet, har så godt forhold til oss at dei tar kontakt for å få hjelp og støtte dersom dei kjenner at dei er i ferd med å sprekke, seier Jan Erik Skjølås.

Han er fagleiar i helse- og overdoseteamet i kommunen.

– Vi er her for å hjelpe brukarane på best muleg vis. Trondheim kommune satsar hardt på å hjelpe dei rusavhengige så dei får best muleg livskvalitet – døgnet rundt, året rundt, seier han.

Helgetilbodet kostar ein million kroner i året, og blir finansiert gjennom LAR (legemiddelassistert rehabilitering).

– Ordninga med helgekjøringa får vi berre positive tilbakemeldingar på, den er gull verdt. Mange seier at ordninga berger liv, og det trur vi eigentleg sjølv også, seier Lene Heimstad.

– Fleire byar burde prøve dette

Tove får LAR-besøk heime

Tove er blant dei som får LAR-besøk heime i helgene. Ho er storfornøgd.

Foto: NRK Trøndelag

Tove har vore rusmisbrukar store delar av livet. Det siste året har ho vore med i helgeordninga, og er full av lovord om den:

– Kommunen må aldri finne på å ta vekk dette tilbodet. Det vil øydelegge tryggleiken for folk, seier ho.

Ho meiner tvert i mot at fleire byar burde ha eit slikt tiltak.

– Da hadde fleire sett kor bra det er, seier Tove i Trondheim.

Video fra Trøndelag

Se vår "timelapse" av juliværet i Trøndelag
Promo folkemøte fra Kimen på Stjørdal