Her får Moser-paret Nobelprisen i medisin

Moser-paret har no fått Nobelprisen i medisin eller fysiologi saman med John O'Keefe i Stockholm konserthus. Det var svenskekongen som delte ut prisen.

– Dette var så stort, og eit flott arrangement, sa May-Britt Moser i eit intervju med SVT etter prisutdelinga.

– Stockholm er ein vakker, vakker stad, sa ho.

Døtrene vart også intervjua på direkten:

– De må vere dei vakraste nobelprisvinnarane som har eksistert, trur eg, sa Isabel Moser.

– Du kan absolutt seie at det har vore eit familieprosjekt, sa Edvard Moser.

• LES OGSÅ: May-Britt Moser: – Kongen var utruleg søt

– Oppdaging av stamcellene og gittercellene, nøkkel-element i hjernens posisjoneringssystem, er eit paradigmeskifte i å forstå korleis spesialiserte nerveceller verkar saman for å utføre høgare funksjonar i hjernen, sa professor Ole Kiehn under utdelinga.

– Gjennom briljante eksperiment har de gitt oss ny innsikt i korleis hjernen skapar åtferd, sa Kiehn.

• Les også: – Jeg tror det er gull, men jeg vet ikke sikkert
• Les også: Tidslinje for oppdaging av stadsansen
• NRK.no-lesernes hilsener til ekteparet Moser

På førehand sa Edvard Moser at han gledde seg veldig til å ta i mot Nobelprisen.

Samtidig var både han og May-Britt og nervøse for det praktiske.

– I dag tidleg øvde vi på korleis vi skal gjere ting. Plutseleg blei det eg trudde var det enklaste i verda, å ta i mot ein medalje, komplisert, sa Edvard Moser.

Når dei skal ta i mot medaljen må dei gå samtidig som svenskekongen, dei må også stanse på same stad som majesteten.

May-Britt Moser var mest nervøs for om ho ville snuble i den spesialdesgina kjolen med nerveceller.

– I utgangspunktet er det enklare å drive med hjerneforsking?

– Det trur eg er enklare, ja, lo Edvard Moser.

(Saka fortset under bildet)

Kjole med upublisert forskingsmateriale

May-Britt Moser sov to timar natt til onsdag, og ho gledde seg veldig til utdelinga. Ho gledde seg ikkje minst til å bli kjent med svenskekongen, som ho skal sitte ved sidan av under Nobelbanketten.

– Eg er utruleg stolt av å gå rundt som ein levande poster, sa May-Britt Moser om den spesialdesigna kjolen med påsydd mønster av gitercellene som dei får prisen for.

– Du ser til og med heksagon-mønsteret.

Kjolen hadde også tema frå eit upublisert forskingsmateriale, kunne May-Britt Moser avsløre, det såkalla «shearing»-prinsippet som vil bli publisert i Nature i 2015. Dette får vi nok vite meir om seinare.

• Les også: Tunnelingeniør designet Nobel-kjolen

Edvard Moser var kledd i kjole og kvitt,

– Det må no vere slik på ein sånn dag, men eg trivst no aller best i t-skjorte, det er ikkje noko å legge skjul på, sa Edvard Moser.

– Du er no vakker i den, då, kommenterte kona May-Britt Moser frå sidelinja.

– Glade for merksemda

Moser-paret er glade for den store feiringa av forskinga deira under nobelveka i Stockholm.

– Vi er utruleg glad for at vitskapen får denne merksemda både i Sverige og i Noreg, og i heile verda, sa Edvard Moser.

– No er det berre glede. No skal vi feire saman. Folk har jobba beinhardt og her er det fine resultat, og folk kosar seg, sa May-Britt Moser.