Her er finalistane i Klassequizen

Mandag 12. november gjekk startskotet for NRKs storsatsing, spørrekonkurransen Klassequizen.

310 skuleklassar over heile landet meldte seg på. Dei har gjennom vinteren konkurrert mot kvarandre på fylkesnivå. Konkurransen har vore sendt i distriktssendingane på radioen.

• RESULTATSERVICE: Korleis gjekk det med ditt lag?

Feira med svele og brus

– No skal vi feire med svele og brus, var kommentaren frå Johan Eckhoff, Magnar Iversen og Ådne Johannes Myrvoll frå Smøla ungdomsskule då sigeren over Myklebust skule var eit faktum og finaleplassen for Møre og Romsdal var sikra.

I Troms var det Eidebakken skole frå Lyngen som gjekk sigrande ut av semifinalen.

– Det var ei utruleg god kjensle, seier Charlotte Christensen.

Med seg på vinnarlaget, som slo Skjervøy ungdomsskole med tre poeng, hadde ho Marius Hoe og Markus Skogheim.

– No blir det spennande å sjå korleis nivået er på dei andre laga, seier Markus Skogheim.

TV-sendt finale

Dei 19 fylkesvinnarane har alt vunne 5 000 kroner til klassen sin. Laurdag 4. mai skal dei møtast i den store finalen i Oslo.

Landsfinalen blir sendt på riksdekkande TV i beste sendetid, med programleiar Solveig Hareide.

– Eg har aldri vore på TV, så det er kjempespennande. Og så er det artig å sjå korleis eit TV-program blir laga, seier Julie Bjørken.

Ho går i tiandeklasse på Vuku oppvekstsenter i Verdal og skal representerer Nord-Trøndelag i den store finalen. Med seg på laget har ho Sivert Forbord og Johannes Voll.

Her er finalistane:

• Finnmark: Vestre Jakobselv skole
• Troms: Eidebakken skole
• Nordland: Kabelvåg ungdomsskole
• Nord-Trøndelag: Vuku oppvekstsenter
• Sør-Trøndelag: Sverresborg skole
• Møre og Romsdal: Smøla ungdsomsskule
• Sogn og Fjordane: Førde ungdomsskule
• Hordaland: Knarvik ungdomsskule
• Rogaland: Grødem skole
• Vest-Agder: Fiskå ungdomsskole
• Aust-Agder: Valle skule
• Telemark: Drangedal 10-årige skole
• Vestfold: Gjøklep ungdomsskole
• Buskerud: Eknes ungdomsskole
• Oppland: Søndre Land ungdomsskole
• Hedmark: Hedemarken friskole
• Oslo: Midtstuen skole
• Akershus: Aursmoen skole
• Østfold: Rødsberg ungdomsskole