– Velkommen inn i skohimmelen, seier Hanna (23) og opnar døra inn til eit rom fullt av sko.
Det er joggesko og sportssko, også kalla sneakers, frå golvet til taket heime i leilegheita hennar på Skatval i Stjørdal.
Hanna har mista teljinga på kor mange sko ho har, men det er i alle fall meir enn 300 par.
No har ho fått eit prestisjefylt oppdrag. Ho har nemleg fått lov til å sette sitt preg på ein sko av legoklossar – i samarbeid med merkevaregigantane Adidas og Lego.
– Det er stort. Det er kjekt å få lov til å bruke kreativiteten sin, seier ho til NRK.
Det var Bladet.no som omtalte saka først.
Personleg preg
Hanna har fått lov til å sette sitt særpreg på legoskoen, ved hjelp av å sette på forskjellige legobrikker og farga, doble skolisser. Prosjektet er eit samarbeid mellom Adidas og Lego.
– Det er kjempekult å få eit så ærefullt oppdrag, seier Hanna.
Ho har henta inspirasjon frå legobrikker med tre og blomsterbukettar. Det var viktig for ho å få med detaljar ho sjølv set pris på når ho får eit par nye sko – mellom anna doble skolisser.
Sjølve designprosessen gjekk ganske fort. Hanna fekk oppdraget i april, og det var kort frist.
– Eg hadde raskt tankar om kva eg ville gjere. Eg laga eit «moodboard» med mine tankar, og sende det inn, fortel stjørdalingen.
Det vart gjort små justeringar, og så kom skoen i posten. No står den utstilt på ein legobutikk i London.
– Det er veldig kult, seier Hanna, som håpar ho snart får sjansen til å reise til London.
– Veldig takknemleg
Hanna er ein av seks personar over heile verda som er plukka ut til å sette sitt preg på ein slik sko.
– Det er seks veldig forskjellige personar som har fått oppdraget. Nokre er legoentusiastar, medan andre driv med musikk eller mote, fortel 23-åringen.
Ho fekk tilbodet om å designe legoskoen gjennom sosiale medium. På Instagram har ho om lag 75.000 følgjarar. Det var gjennom Instagram-kontoen hennar Lego fann ho.
– Eg føler meg heldig. Det er mange gode kandidatar der ute, så eg er glad for at dei såg eit potensial i meg. Eg er berre veldig takknemleg.
Moods-gründer: – Ekstremt imponerande
– Wow, det er jo ekstremt imponerande, seier Moods-gründer Simen Staalnacke om det internasjonale oppdraget til skosamlaren.
– Hanna har ein unik stil, og når Lego og Adidas vil samarbeide, er det eit stort kompliment, legg han til.
Stryningen står bak klesmerket Moods, tidlegare Moods of Norway, som han grunnla saman med to kameratar i 2003. Dei satsa stort på den amerikanske draumen. I 2017 gjekk firmaet konkurs. I mars 2019 vart motemerket lansert i ny drakt, under namnet «Moods».
Staalnacke har med andre ord opplevd både oppturar og nedturar i bransjen.
Han kjem med råd til unge personar som ynskjer å satse på ei karriere innan design eller i motebransjen:
– Det er viktig å ha ein tanke om korleis det ferdige produktet skal sjå ut, og jobbe seg fram til det. Det er berre å kaste seg ut i det, og stole på seg sjølv. Det beste er å designe med hjartet, og følge sin eigen smak, meiner han.
Ville ha unike sko i samlinga si
Interessa for sko har Hanna hatt lenge. Det starta med at ho forsøkte å få tak i litt spesielle sko på nett, som skilde seg ut frå skoa til resten av klassekameratane.
– Eg skjønte raskt at det var vanskeleg å få tak i unike sko. Då eg klarte det, var det ein meistringsfølelse. Og så vart eg hekta.
– Kva er ambisjonane dine framover?
– Eg vil sjå kva moglegheiter som kjem. Dette samarbeidet viser at det finst mange måtar å vere kreativ på, og mykje kult ein kan gjere.
Hanna studerer psykologi, men ho kjem til å halde fram med å utvide skosamlinga.
– Eg vil definitivt fortsette med dette. Eg må vel kjøpe meg ei større leilegheit snart, seier Hanna og ler.