Like etter klokka 11.00 måndag føremiddag rykka naudetatane ut til ein brann på Bangsund i Trøndelag.
Ingen personar var heime
– Vi fekk melding frå ein nabo like etter klokka 11. Meldaren forsøkte å komme i kontakt med eigarane av huset, fortel operasjonsleiar Wenche Johnsen i Trøndelag politidistrikt.
Alle bebuarane i huset har no fått beskjed. Det var ikkje folk i huset då brannen starta.
– Det er full overtenning i bustaden. Vi held på å prøve å sløkkje brannen, sa brannvakta i Namsos til NRK klokka halv tolv.
Fare for spreiing
Det var lenge ein viss fare for at brannen skulle spreie seg til eit hus i nærleiken, men no har naudetatane fått kontroll på brannen.
Brannvesenet driv framleis med ettersløkking.
– Huset er totalskadd. Det kan ikkje reddast, opplyser politiet like etter klokka 12.
Dei er framleis på staden, og vil etterforske kva som var årsaka til brannen.