Ein ny vår kjem i Flatanger

– Storbrannane på Frøya og i Flatanger gir naturen ein ny start, seier biolog og forskar ved Norsk institutt for naturforskning, Frode Ødegaard.

Han har vore i brannområda i Flatanger tidlegare i vår, og kunne konstatere at det er store brunsvidde område i terrenget der.

– Men det er utruleg kor fort det går før det spirar i dei svarte flatene, seier han.

– Det går veldig raskt å få auka grasvegetasjon etter ein slik lyngbrann.

• Les også: Her blir det grønt til sommaren
  

Spennande nye artar

Lyngen kjem opp på ny og skaper gode beitetilhøve. Etter skog- og lyngbrannar skjer det også spennande ting, både med plantar og insekt.

– Skog- og lyngbrann er ei naturleg forstyrring som naturen er godt tilpassa for å tåle. Alle dei gamle artane klarer å overleve, og så kjem det mange nye artar. Det blir nytt liv i naturen, seier Ødegaard.

• Les: Ekstremver og skogbrann er bra for artsmangfaldet

Over tid vil artane bli bytta ut, heilt til det gror igjen slik det var før.

– Men det vil ta fleire tiår før naturen ser ut som før storbrannen, trur Ødegaard.