Morten Eilifsen har aldri vore på pallen i eit NM tidlegare, men torsdag tok steget heilt til topps.
- Dette var topp. Herleg! Det var berre å gå som f.... heile vegen og det funka bra. Det er heilt konge med eit NM-gull. Kjempedeilig, rett og slett. Eg starta hardt og auka, seier Eilifsen til NRK Sport rett etter han gjekk i mål.
Sekundstrid
Han slo skiskyttar Ronny Andre Hafsås med 3,6 sekund. Heller ikkje Hafsås, som representerer Stårheim, har vore på pallen i eit NM tidlegare.
- Eg er veldig godt fornøgd. Eg prøvde å opne roleg. Sidan eg fekk høyre at eg opna for sterkt i fjor, så eg prøvde å gå rolegare i år, seier Hafsås.
Petter Northug frå Mosvik blei nummer tre på 15-kilometeren i Granåsen.
- Eg ynskte å kjempe heilt i toppen i dag og følte det stemte bra. Eg gjorde eit godt løp, men dei to andre gjekk veldig fort, seier Northug.
Northug datt
Rundt sju kilometer fall Petter Northug ute i løypa.
- Eg datt og blei litt stiv, men eg kunne ikkje hamla opp med dei to beste uansett i dag, seier Northug.
Han skal no ha ein roleg dag før han stiller til start på tremila og stafetten.