Etter ti dagar med streik blei partane i busstreiken einige torsdag morgon. Frå klokka 12 i føremiddag kunne bussane endeleg rulle ut på vegane igjen.
– Det er veldig bra for alle kundane våre som skal ut og reise, så dette er vi glade for alle saman, seier Grethe Opsal, direktør for kommunikasjon og drift i transportselskapet AtB.
Delte meiningar
Det var brot på forhandlingane mellom NHO Transport og Spekter på arbeidsgjevarsida, og Yrkestrafikkforbundet, Fellesforbundet, Jernbaneforbundet og Fagforbundet på arbeidstakarsida som førte til streik.
NRK var til stades på Skyss sin store bussparkering på Haukås, nord i Bergen, då streiken gjekk mot slutten. Her var det blanda kjensler om utfallet av forhandlingane. Ikkje alle var nøgde.
– Det er veldig delte meiningar om dette. Det trur eg ikkje gjeld berre her i Bergen, men i heile landet, seier Helge Myking.
Han sto sjølv på parkeringsplassen og passa på at ingen bussar køyrde ut frå plassen før klokka var 12.
Ein av dei som sat klare då var bussjåfør Rita Toen. Ho blei ein av dei første sjåførane ut på vegane i Bergen då streiken var over.
Men det var med blanda kjensler ho starta motoren klokka 12.
– Det er litt bittert å gå tilbake på jobb, fordi resultatet var mykje dårlegare enn vi hadde ønskt. Vi får sjå kva som skjer vidare, seier ho til NRK.
Ho fortel at passasjerane har vore svært støttande under streiken.
– Vi er sikkert veldig velkomne tilbake likevel. For deira del, seier ho.
Og det har ho rett i.
– Du ser kor mange som er avhengige av bussen. Samstundes må ein skjøne at dei som streikar ikkje streikar utan grunn, seier busspassasjer Asbjørn Thon i Bergen.
– Ikkje fornøgde
Heller ikkje i Trondheim var bussjåførane spesielt fornøgde med utfallet.
I ei pressemelding frå Yrkestrafikkforbundet står det at lønnsoppgjeret for bussjåførane inneber eit generelt tillegg på fem kroner og femti øre. I tillegg kjem eit fagbrevtillegg på éi krone i 2020.
– Vi er ikkje fornøgde i det heile tatt. Kravet var 20 kroner, og når vi sit igjen med fem kroner og femti øre er vi ikkje fornøgde, seier Magne Kråkvik, nestleiar i klubben til Tide.
Bussjåfør Jan Sætervang var glad for å vere tilbake på jobb i dag.
– Eg har sakna å køyre buss. Det var eit heilt greitt oppgjer. Vi kan kanskje ikkje forvente å få alt på ein gang, seier han.
Avtalen skal no til uravrøysting blant medlemmane i fagforeiningane.
Dyrt med elsparkesykkel til skulen
For studentane var det kjærkome for økonomien at bussane endeleg var tilbake på vegane.
– Akkurat no er eg på veg til skulen. Det er eg veldig glad for. Eg går på NTNU Dragvoll, så det er eit stykke. (1 times gangavstand frå Trondheim sentrum, journ.anm.) Elles blir det elsparkesykkel heile vegen opp, og det blir fort litt mykje pengar på studentbudsjettet, vedgår Sofie Bakke.
– Det var veldig godt å kunne ta bussen igjen. Eg har brukt mykje pengar på taxi i det siste. Eg er veldig avhengig av buss både til jobb og skule, seier Ane Estil til NRK.