Bruker smarttelefonar i jakta

- Sol opp, sol ned, månetider, nyheiter, skytebaner, fisketips, ramsar Espen Farstad opp. Han er informasjonssjef i Norges Jeger- og fiskeforbund.

For det er blitt meir vanleg å ta med smarttelefonen på jakt. No kan du for eksempel få tips om kva du bør og ikkje bør gjere via telefonen.

• LES OGSÅ: Advarer om stor elgfare

- Det var bror min som tipsa meg om ideen, seier Tore Mørkved frå Levanger. Han har laga ein såkalla app til mobiltelefonar.

Frå bok til telefon

- Han har jakta i mange år, og fylt ut statistikk i ei lita bok der han loggfører forskjellige tal, mellom anna kva ryper han har sett, forskjellige artar, ver og forskjellig, seier Mørkved.

Dermed sette han i gong med sitt program.

- Bror min har ein Iphone, og lurte på om det ikkje var mogleg å få loggført dette her på ein fin måte, og kanskje få litt fin statistikk ut av det. Det tente eg litt på, og prøvde å bli ferdig med ein versjon til haustjakta. Det klarte eg, fortel han.

Gjennom programmet han har laga kan ein loggføre kor mange skot ein løyser, kor ofte ein treff, og kva for artar ein ser.

• Høyr radioreportasjen med dei forskjellige applikasjonane under.

Kan lokke med telefonen

Applikasjonen er ikkje den einaste på marknaden i dag. Norges Jeger- og Fiskeforbund har lansert to applikasjonar retta inn mot fiskerar og jegerar.

- I tillegg har me laga ein liten tilleggsfunksjon, seier informasjonssjef Espen Farstad.

- Ein lokke-app. Dei siste åra er det blitt veldig populært å bruke aktiv lokking når du er på jakt. Det kan vere at du imiterer ein skada småfugl for å lokke til deg ein rev, eller du brøler som ein hjort for å lokke til deg ein hjort. No har me laga ein eigen lokkeapp med 35 lydar, som du får rett i lomma, seier han.

• LES MEIR OM JAKT:
• Klare for høstens våteste jakt
• Her vil de jakte elg til jul
• Mange elg å jakte på i Trøndelag

- Interessant

At dette kan vere viktige reiskap for jegerar å ha med ut i skogen er også Andreas Jørgensen og Øyvind Høyslo Winge einige i.

- Det er sikkert mange som får bruk for appen etter kvart, når dei berre lærer seg å bruke den. Det er mykje interessant du kan bruke den til, seier Høyslo Winge.

Dei to trur at det heller blir jegerane rundt 30 år som prøver desse verktya enn dei som er eldre. Men sjølve reiste dei heim frå fuglejakt for å prøve.

- Me må vel prøve det, seier Jørgensen.