Brannen starta rett før klokka 12 laurdag formiddag.
Familien på to vaksne og fire barn var heime da brannen oppstod, og dei berga seg ut av huset og i sikkerheit hos naboar.
Prøvde å slokke brannen
– Brannen ser ut til å ha starta på kjøkenet, i ein komfyr, seier politibetjent Kenneth Voll.
– Dei prøvde å slokke brannen, men etter kvart vart det så mykje røyk at dei måtte forlate kjøkenet for å unngå å bli skadd, seier han.
Det er uklart korfor komfyren begynte å brenne.
– Vi har ingen opplysningar som tilseier at det var til julebakst med til dømes smultgryter som førte til at det begynte å brenne, seier Voll.
Full overtenning
Brannvesenet kom raskt til staden, men måtte konstatere at bustadhuset ikkje sto til å redde. Dei måtte foreta ei kontrollert nedbrenning av huset, og sette alle kreftene inn på å berge nabobygningane.
– Det var full overtenning da vi kom, seier Arild Overrein, fagleiar i brannvesenet.
– Vi fekk avklart at det ikkje var folk i huset, og konsentrerte oss om å berge nabobygningane, seier han.
– Men dette er jo trasig, berre nokre få dagar før jul. Julegaver, julestemning, alt er borte, seier Overrein.