– Vi fekk ei nødmelding frå Hitra. Det er ein engelsktalande person som ropar «SOS», og seier at båten han er i ligg opp ned. Linja vart broten.
Det fortel operasjonsleiar Lars Berget i Trøndelag politidistrikt til NRK.
Politiet vart varsla klokka 11.02 onsdag føremiddag.
Hovudredningssentralen vart informert, og det blei sett i gang ein storstilt redningsaksjon. Det tok tid å finne den kantra båten, men situasjonen er no avklart.
Fire personar sendt til St. Olav
Like før kl. 12 skriv politiet på Twitter at fire personar er observert liggande oppå ein kantra båt ved Ulvøya og Fjellværøya, ifølge Hovudredningssentralen.
Rett etterpå skriv dei at personane blir heist opp i redningshelikopteret frå Ørland.
Dei blir frakta til St. Olavs hospital, og får ein medisinsk sjekk. Dei er nedkjølte etter at dei hamna i vatnet, før dei klarte å klatre opp på båten.
– Dei fekk tilsyn av ein lege i helikopteret, som bestemte at dei skulle bli flydd rett til St. Olavs hospital. Vi veit ikkje kor nedkjølte dei var. Vi har ikkje høyrt noko frå sjukehuset, seier operasjonsleiar Berget.
Ifølge Hovudredningssentralen var det snakk om ein relativt liten fritidsbåt med tyske fisketuristar. Det vart først meldt om éin person i båten, men det var altså fire personar der.
Politiet bekreftar at ingen andre personar er sakna etter hendinga.
– Vanskeleg redningsaksjon
Det vart sendt ut luftambulanse med dykkarar frå Trondheim, i tillegg til brannbåt, for å leite i området. Det skal ha skjedd aust for Hitra. Det var også redningsskøyte i området.
Ifølge Hovudredningssentralen var det ein del vind i området.
Skipsførar Werner Huse på redningsskøyta Horn Flyer sa til NRK at dei har leita med store ressursar, og at redningsaksjonen var vanskeleg.
– Det har begynt å blåse opp litt. Men det er god sikt. Men det er ikkje så godt å sjå nokon i bølgene, sa han like etter klokka 11.30.
Operasjonsleiaren hos politiet seier at det verkar som turistane har blitt overraska over vinden, og kantra.
– Det enda heldigvis godt. Det verkar som dei er i god tilstand, seier Berget til NRK i 13-tida.