Dei tre frå Nord-Trøndelag kjem frå Namsos, Levanger og Stjørdal, i følge Fylkesmannen i Nord-Trøndelag. Dei presiserer at talet kan vere usikkert.
Det skal vere ein 15-årig gut frå Levanger, ein 16-åring frå Stjørdal/Meråker, og ei 19 år gammel kvinne frå Namsos.
Politiet i Sør-Trøndelag stadfestar overfor NRK at det er fem personar som er sakna. Fire frå Trondheim, og ein 17-årig gut frå Orkanger.
Leiteaksjonen rundt Utøya konsentrerer seg no rundt 4-5 sakna personar. I tillegg er 85 personar stadfesta drepne etter massakren fredag. Identifiseringsarbeidet av dei drepne er i gang.
37 kom til Trondheim
Alle kommunar har no sett i gong sine kriseteam etter det som skjedde i Oslo og på Utøya fredag. Gjennom fylkesmannen skal dei rapportere om utviklinga i sin kommune til Helsedirektoratet.
37 ungdomar frå med tilknytning til Trøndelagsfylka kom seint laurdag kveld frå Utøya tilbake til Trondheim. Dei vart tekne i mot på mottakssenteret som Trondheim kommune har oppretta, og vart tekne vare på der.
- Senteret blir halde ope til over helga, seier Trondheimsordførar Rita Ottervik (Ap).
- LES OGSÅ:
Kartlegg kven som vil ha hjelp
Gjennom senteret tilbyr dei overnatting til dei som treng det, samstundes som det blir kartlagt kven som treng helsetenester på seinare tidspunkt.
- Det blir minnestund, og det blir jobba med oppfølging både frå kommunen og partiet si side i dagane og vekene framover. For dette vil ta tid, seier ordføraren.
- LES OGSÅ: |
Kyrkjene har gjennom helga blitt oppmoda om å halde dørene opne. Søndag kveld blir det også kveldsgudsteneste med lystenning i Nidarosdomen, med mellom anna ordføraren til stade.
