Klagestorm etter buss-stans: Camilla (29) venta i over to timar

– Eg kom heim igjen iskald, svolten og sur, fortel Camilla Skaret.

I går ettermiddag vart tolmodet hennar verkeleg sett på prøve.

Transportselskapet AtB innstilte alle bussar i Trondheim onsdag kveld på grunn av svært vanskelege køyreforhold.

Det vart meldt om kaos på vegane på det glatte vinterføret.

Måtte vente i fleire timar

Skaret var ferdig på jobb på Tiller, litt over ei mil utanfor sentrum, i går kl. 16. Då ho skulle ta ein buss inn til sentrum, måtte ho vente i halvannan time før det kom noko buss.

– Det var ingen metrobuss i sikte i alle fall. Dei kom seg visst ikkje opp bakkane, seier Skaret.

Ho gjekk av ved Nidarosdomen for å bytte buss. På haldeplassen sto det ein buss med nødblinken på, som ikkje kom seg av flekken.

Etter å ha venta i over ein time der også, innsåg Skaret at ho måtte ta beina fatt. Kl. 19.30 var ho endeleg heime.

– Eg stupte ned i sofaen, og fekk endeleg mata kattane mine, fortel 29-åringen lattermild.

Skaret bur ganske sentralt i bydelen Møllenberg, men for andre som bur mindre sentralt vart det ein mykje lenger spasertur på glatta.

Det raske vêrskiftet førtet til at brøytemannskapa ikkje rakk å brøyte og strø på alle vegane, ifølge AtB.

– Det var ekstremt glatt, så det var ikkje gode køyreforhold. Det blei problem overalt på ein gang, seier Grethe Opsal. Ho er direktør for marknad og kommunikasjon i AtB.

Folk fortvilar på Facebook

Men Skaret og andre passasjerar fann ikkje noko informasjon om dei innstilte avgangane.

– Det vart gitt informasjon på skjermane på haldeplassane, men der ligg det ei stripe nedst som kan vere litt vanskeleg å sjå for kundane, fortel Opsal.

– Når det gjeld det å få informasjon i appen, så har vi stor forståing for at kundane opplevde det som mangelfullt. Vi jobbar med å få til betre avviksinformasjon når det oppstår situasjonar, legg ho til.

Fleire passasjerar har posta kommentarar på Facebook-sida til transportselskapet, der dei fortvilar over at dei måtte vente lenge ute i kulda.

– Det er sjølvsagt svært beklageleg at det blei lang ventetid på våre passasjerar, men sikkerheita kjem først, svarar dei.

– Ein ekstraordinær situasjon

23:15 melde selskapet at bussane var tilbake i drift. Torsdag går bussane som normalt.

– Bør ein ikkje vere førebudde på eit vanleg, norsk vinterføre på vegane?

– Det var fleire som burde ha vore førebudde på at det blei vanskelege køyreforhold. Det gjeld dei som driv med vedlikehald på vegane også, meiner Opsal.

NRK har forsøkt å få ein kommentar frå Trondheim bydrift utan hell.

Skaret meiner AtB «absolutt burde ha vore betre førebudde».

– Bussane kom køyrande med kjetting før i tida. Eg kan ikkje skjøne at det ikkje går.

Opsal fortel at det er sjeldan dei må innstille alle bussane i byen.

– Det var nok ein ekstraordinær og spesiell situasjon for alle i går. Vi vil seie at bussane våre er tilpassa vinterforhold, hevdar ho.

Skaret vil vere på den sikre sida, og har derfor ordna seg skyss heim frå jobb i dag.

– Eg vurderte faktisk heimekontor, seier 29-åringen.