– Det er som hår i dusjsluket.
Slik forklarar Jan Morten Boneng, overingeniør i Statens vegvesen, korleis det fløymde over på Egge i Nord- Trøndelag tysdag.
– Slikt skjer når det er mykje vatn og begrensa plass i avlaupet. Regnvatnet tar med seg mykje rusk og rask på vegen som tettar sluk og kummar, og gjer at vatnet ikkje får mogelegheit til å renne unna, seier Boneng.
- LES OGSÅ: Vegvesenet skal sikre seg bedre mot flom
For lav og flat for kraftige regnskurar
Eggetunnelen har eit naturleg lavpunkt og flate parti. Derfor samlar det seg lett vatn i denne tunnelen når det regnar mykje.
– Det skjer ikkje så ofte, men når det er ekstreme nedbørsmengder som det var på Steinkjer tysdag, kan det bli slik, forklarar Boneng.
Når det fløymer over, reiser Statens vegvesen ut og fjernar rasket som tettar igjen sluka. For å førebyggje at det tettar seg, kostar dei vegane jamnleg.
– Men dersom me skal vere heilt sikre på at Eggetunnelen ikkje fløymer over igjen, må me byggje om avlaupssystemet. Det kan bli eit stort og dyrt arbeid.
- LES OGSÅ: Mener E6 i Øyer skaper flom
(artikkelen held fram under bilete)
Meir regn og oftare flaum i framtida
Men det kan løne seg på lengre sikt å auke kapasiteten til avlaupssystemet.
– Eg vil anbefale meir varige tiltak for å hindre at det fløymer over i tunnelen på nytt. Det vil sannsynlegvis skje oftare i framtida, nemleg.
Cecilie Flyen Øyen er seniorforskar og forskingsleiar ved SINTEF Byggforsk. Ho undersøkjer kva konsekvensar flaum kan ha på bygningar i tettbygde strok.
– Globale modellar for klimaendringar viser at det sannsynlegvis blir varmare og meir nedbør framover, fortel ho.
– Der det er lite regn i dag, vil det kome mindre. Der det er mykje regn i dag, vil det kome meir.
- LES OGSÅ: NVE øker flomberedskapen
Slepp vatnet fri!
Jo mindre byane er, jo mindre er røyrsystema ofte. Derfor kan mykje regnvatn vere enda vanskelegare å bli kvitt i mindre byar som Steinkjer.
– Det handlar om å forsinke vatnet mest mogeleg før det renn ned i kummane. Renn det for mykje vatn for fort, fløymer det over.
Det beste er å la naturen ta vare på vatnet i staden for å leie det ned i røyrsystem, seier Øyen.
For å hindre at det fløymer over ved kraftig nedbør, kan ein derfor
- opne bekkar som er lagde i røyr.
- kople fri takrenner slik at vatnet renn ned og trekkjer inn i bakken i staden for å renne direkte ned i kummar. Hugs å leie vatnet vekk frå bygningane.
- ha fleire område med overflater som vatnet kan trekkje ned i, til dømes byte ut asfalt med grus.