– Dei har sagt på førehand at dei vil gå for å lage mål tidleg. Dei køyrer kanskje på frå starten, og då må vi vere flinke til å utnytte det, seier Rosenborg-keeper Daniel Örlund.
– Ingenting å tape
Han gler seg til å spele mot gamle lagkameratar, men vil ikkje undervurdere laget som tapte 0-1 mot Rosenborg for ei veke sidan.
AIK har gått frå topp til botn på eitt år. Rosenborg tronar på toppen av norsk eliteserie, medan stockholmsklubben er nest sist i botnen av tabellen i Allsvenskan. Det betyr ikkje at RBK kan slappe av, ifølgje Örlund.
– Dei kjem nok til å gjere alt for å gå vidare. Ein strekk seg alltid litt når ein spelar mot betre motstandarar, og AIK har ingenting å tape, meiner keeperen.
Fekk ein vekkar på søndag
Søndag slapp Rosenborg inn tre mål mot Haugesund, men klarte likevel å berge sigeren. Keeperen er ikkje uroa over alle måla som gjekk inn feil veg.
– Eg synest det er bra at det hende. Vi fekk ein vekkar, og no byrjar vi om att, seier Örlund.
Returoppgjeret mellom Rosenborg og AIK kan du følgje her på nrk.no/trondelag, og på NRK P1. Kampen startar kl. 20.45.
