Kotimaa
Opettajalakko oon jatkunu meilä Norjassa jo yli kuukauđen. Tällä hetkelä noin 3500 opettajaa oon lakossa, ja Opetusliitto, Utdanningsforbundet, varottaa, ette tiistaina luku saattaa nousta jo yli kuutheen tuhantheen.
Kolmen liiton (Utdanningsforbundet, Skolenes Landsforbund ja Norsk lektorlag) aloittamma lakko koskee opettaajiitten palkkoi, joista liitot ei tullu yksmielisiksi palkkaneuvoteluissa Komuuniitten Keskusliiton, Kommunenes Sentralforbund, kans.
Lakon takia moni peruskoulun ja jatkokoulun oppiija ei ole saattanu aloittaat kouluu vielä tänä syksynä.
Sähkön hinnat nousthaan ympäri maata. Nyt kans Pohjas- ja Keski-Norjassa, missä hinnat oon kesän aijan pysyny matalanna, oon lähteny kovhaan kasvhuun ja eilen tuorestaina hinnat olthiin 2000 % korkkeemat ko keskimäärhiin kesälä.
Kovviin hinttoin takia moni firma oon vaikkeuksissa ja elämänkeinoministeri Jan Christian Vestre (Ap) tullee tääpänä kohđattelemhaan LO:n, NHO:n ja Virken ja praattaamhaan mahđolisesta avustuksesta.
Oslon kaupunki ja poliisi oon huolestunnu kaupungin väkivaltatappausten nousuvasta määrästä. Lyhykäisen aijan aikana kaupungissa ihmissii oon niin kuolu ette haavoittunnu ampumis- ja puukkohyökkäyksissä, viimiseksi maanantai ko kaksi miestä haavoittui puukkotappauksessa.
Vaikka tappauksilla ei ole selvää sammaa motiivii, mutta tekkiijät oon usheesti nuorii miehii.
Mailma
Ison-Britannian ja Pohjas-Irlannin yhđistynheen kuninkhaanvaltakunnan kuningatar, Elisabet II, kuoli eilen tuorestaina 96 vuođen ikhäisennä. Kuolemasta ilmoitti maan kuningashuone ja se muisteli ette 70 vuotta vallassa ollu kuningatar kuoli rauhalisesti Balmoralin linnassa perheen keskelä.
Kuningattaren vanhin poika, Charles, oon nyt kuninkhaanvaltakunnan kuningas. Hän oon ottanu nimeksi Charles III ja tullee tääpänä pitämhään saarnan äitiinsä kuolemasta.
Britannia sai tällä viikola uuđen staatinministerin. Kilpa staatinministerin virasta alkkoi ko Boris Johnson jätti virkkaansa usheen kriisin takia, ja se käythiin Liz Trussin ja Rishi Sunakin välilä. Lopulta maan konservatiivi parttii valitti parttiin uuđeksi johtaajaksi ja samala maan uuđeksi staattiministeriksi Trussin.
Hänestä tuli viiminen staatinministeri kuningatar Elisabetin vallan aikana.
Jopa yli kolmas osa Pakistanista oon tällä hetkelä veđen alla. Suurtulva, jonka kovat satheet oon muun muassa luonu, oon ajanu monnii tuhanssii ihmissii heiđän kođiista. Lisäksi moni oon kuolu ja FN uskoo, ette tila tullee vain muuttumhaan pahemaksi.
Sunnuntai aamuna 10 ihmistä löyđethiin kuolheena Canadan alkupöräskansa plaanalta Saskatchewanin provinssissa. Lisäksi 18 ihmistä oli haavoittunnu.
Tevon takana oli veljekset Damien Sanderson (31) ja Broren Myles (30), jokka oli hyökäny näitten ihmisten kimpphuun puukon kans. Canadan poliisi löysi miehet hiljemin kuolheena ja siksi tevon motiivi oon epävarma.
Hei sinule!
Har du tanker om saken du har lest, eller innspill generelt til Viikon tärkkeimät uutiset? Send meg gjerne en e-post!