Kotimaa
Hallitus piti justhiin pressekonferensin koronantilasta Norjassa ja jälleenaukaisemisesta. Tervheysministeri Bent Høie (H) sannoo, ette maa aukaisthaan heti.
– Hiljain 90 prosenttii raavhaista oon saanu molemat vaksiinit. Se meinaa ette met olema heti siinä prikussa, ette met saatama saađa meiđän normaalin arkipäivän takaisin. Met emme nyt saata sannoot koska se tapahtuu, mutta met saatama sannoot mitä sitten tullee tapahtumhaan.
Høie sannoi, ette ko maa jälleenaukaisthaan, suuriinosa reekeleistä poistethaan, mutta ette ihmiset häyđyhtään vielä pittäät huolen hygieniasa.
Kato koko pressekonferenssi tästä:
Norjassa piđethiin maanantaina isotinkavaalit. Maa tullee saamhaan nyt uuđen hallituksen, sillä vasemala oleva Työväjenparttii (Arbeidersparti) voitti vaalit poimimala eniten äänii. Partii tullee luultavasi perustamhaan hallituksen yhđessä Sentteriparttiin kans, joka kasusi kannatusthaan eniten kaikista partiista.
Kolmas mahđolinen hallituskumppani oon SV (norsk. Sosialistisk Venstreparti). Työväjenpartiin johtaaja, ja tuleva staatinministeri Jonas Gahr Støre neuvottellee nyt muiđen parttiitten kans tulevasta hallituksesta.
Saamikäräjävaalit piđethiin kans maanantaina. Nordkalottfolketista tuli käräjän toiseksi isoin puolue. Se ajjaa kans kvääniin oikkeuksii maassa.
– Met emmä tule ajjaa kvääniin oikkeuksii Saamikäräjillä, mutta met pidämä huolen ette kvääniin oikkeuksii ei diskrimineerata niissä assiissa mitkä otethaan ylös käräjillä, sannoo johtaaja Toril Bakken Kåven.
Tuorestaina Norjassa 982 ihmisillä oli koronatartunta. Se oon 647 vähemän ko viimi viikola samana päivänä. 97 henkii oon sairashuonheela koronan takia.
Eilen keskiyölä 4 022 212 oli saanu ensimäisen vaksiinin, ja 3 515 396 hengelä oli molemat. Se meinaa ette 65,2 prosentila oon jo molemat vaksiinit.
Harvempi loukkaanuthaan nyt sähköpotkulauđala ko ennen, sannoi ylilääkäri Henrik Siverts Uslusta TV 2:le. Syynä saattaa uusi reekeli, joka tuli voimhaan 10. septemperikuuta. Sen jälkhiin Uslussa ei saa olla enämpi sähköpotkulauttoi ko 8000 ja niitä ei saa käyttäät yölä.
Viikko ennen reekeliä, pyhänä 3.-5. septemperikuuta, 29 loukkaantui potkulauđan takia. Reekhelin jälkheen, pyhänä 10.-12. septemperikuuta, tyhä 12 loukkaantui.
Mailma
Venäjän vaalit oon nyt alkanu. Ihmiset uskothaan ette hallitusparttii Sameinte Russland (finsk. Yhtenäinen Venäjä) tullee taas voittamhaan vaalit.
USA, Australia, Japani ja India järjestehään yhteismöötin Valkkeessa Talossa 24. septemperikuuta. Se oon ensimäinen kerta ko presidentti Joe Biden tappaa maiđen staatinministerit fyysisesti. Joukkoo kuttuthaan nimelä Quadrilateral Security Dialogue, joka sai alun vuođen 2004 tsunamista Indianmerelä.
- Quad-johtaajat tullee praathaan heiđän sitheiđen vahvistamisesta ja yhtheistyöstä covid-19 vasthaan. Het jutelhaaan kans kliimakriisistä, teknologiasta, internetistä ja kunka het saatethaan luođa vaphaan ja aukinaisen indopasifikin plaanan, sannoo Valkkeen Talon pressehenki Jen Psaki.
Nelje avaruusturistia oon ammuttu ensimäisen kerthaan ikinä avaruutheen ilman astronauttii. He lähđethiin matkaan eilen Kennedyn Avaruus Sentteriltä Floridassa. Het tulhaan kierthään maapalloa kolme päivää.
Matkan takana oon 38-vuotinen mïljonääri Jared Isaacman
Afrikassa tyhä 3,6 prosenttii oon saanu molemat vaksiinit, ja nyt mannermaassa oon neljes korona-aalto. Jokku Pohjois-Afrikan maat, esimerkiksi Algeria, Egypti ja Tunisia, oon kauheen huonossa tilassa.
Mailman tervheysjärjestön WHO:n sekretääti Tedros Adhanom Ghebreysus sanoi pressemöötissä, ette muu mailma oon unheetanu Afrikan kontinentin, ja sen takia virus jatkaa leviämisthään.
G20-maat aijothaan pittäät hiljain möötin Afganistanin tilasta. Niin sannoo Italian ulkoministeri Luigi Di Maio aviisi La Repubblicale Reutersin jälkhiin.
Franskassa yli 120 000 ihmistä osoitehtiin mieltä koronapassia vasthaan. Franskassa tyhä ihmiset, joila oon molemat koronavaksiinit, saađhaan mennä restauranthiin, kafeahoin ja muutamhiin muihin viralishiin plassiin.
Lauvantaina oli 20 vuotta siitä ko mailman pahoin terrorihyökkäys tapahtui USA:ssa 11. septemperikuuta 2001. Hyökkäyksessä kuoli 2 977 ihmistä, ko terroristit iskehtiin flyyiilä World Trade Center tornhiin.
Hyökkäys oli kans alku sođale Afganistanissa, joka päättyi tänä vuona.
Meiđän mailma
Kyläpeli/Landsbyspel alkkoi eilen Raisissa. Se oon kultuurinen tapattuma, missä kväänin kulttuuria esitethään teatterin kautta. Kaikki piletit oon myyty lopphuun.
Kvensk Finsk Riksforbund piti vuosimöötin viimi pyhänä. Liitto sai muun muvassa uuđen juridisen nimen, vedtektit ja styyrin. Styyrissä istuu nyt Bjørnar Seppola, Marie Konstanse Skogstad Wallo, Tobias Eriksen, Elin Brandvoll ja Henry Koht.