Hopp til innhold

Manglar pengar til milliardutbygging - kan bety meir bompengar

Det er ikkje pengar nok til å finansiere alle tiltaka i Harstadpakken. Dermed må fleire av utbyggingane setjast på vent - og kanskje må bompengeavgifta aukast.

Kanebogenkrysset i Harstad
Foto: Martin Mortensen/NRK

Det store vegprosjektet Harstadpakken inneheld fleire tiltak enn det er pengar til å bygge, og styringsgruppa ber no om at kommunen jobbar for å finne meir pengar å jobbe for.

Det skriv Statens vegvesen på sine nettsider.

Det skal investerast for 1,6 milliardar kroner i dette vegprosjektet, som inneheld utbyggingar som gang- og sykkelsti, i tillegg til prosjekt innanfor kollektivtrafikk og vei- og næringstransport.

No er det fleire av prosjekta som må setjast på vent, seier ordførar i Harstad, Marianne Bremnes.

Marianne Bremnes

Ordførar i Harstad og leiar av styringsgruppa for Harstadpakken, Marianne Bremnes, seier at pengane ikkje strekk til for å få fullført alle tiltaka i Harstadpakken.

Foto: Per-Einar Grønmo

– Pengene strekk rett og slett ikkje til så langt som vi skulle ønske. Det vi byggar skal vere av god kvalitet og det skal vere framtidsretta, og da er det ikkje rom for å bygge alt som står på lista, seier Bremnes i ei pressemelding frå Statens vegvesen.

Bremnes er leiar av styringsgruppa til Harstadpakken. I styringsgruppa sit også fylkesråd for samferdsel og miljø, Ivar B. Prestbakmo og regionvegsjef i Statens vegvesen, Torbjørn Naimak.

For dyrt

Prosjektleiar for Harstadpakken, Hans-Arne Haugland, forklarar pengemangelen slik:

– Årsaka er at vi no, etter å ha innhenta anbod på dei fleste av dei store delprosjekta, ser at summen av dette gjer at ein del andre prosjekt må setjast på vent.

– Kva skal til for å få nok pengar til å gjennomføre alle prosjekta?

– Styringsgruppa har mellom anna peika på at det akkurat no er mykje lågare renta enn det stortingsproposisjonen hadde som forutsetjing, og styringsgruppa har oppfordra Harstad kommune om å kome med eit prinsippvedtak om ein ønsker å fullføre Harstadpakken slik det var tenkt, eller om ein synest det er okei at det blir eit redusert omfang.

Harstadpakken skal finansierast gjennom pengar frå stat og fylke, i tillegg til at det frå juni i år blir innført bompengeavgift.

Millionbeløp

– Kor mykje pengar er det som manglar for å få fullført prosjekta?

– Det må vi ha litt betre tid på oss til å berekne, og vi må også sjå på reguleringsplanar, omfang og vurdere om akkurat dei prosjekta som lå inne er riktig, seier Haugland, som utdjupar at det dreier seg om eit beløp på fleire hundre millionar.

Ei auke i bompengeavgifta kan dermed vere aktuelt.

– Harstad har ein av dei lågaste passeringstakstane i landet, men dette er noko vi må kome tilbake til. Det er ein alternativ måte å finansiere dette på.

I pressemeldinga frå Statens vegvesen seier fylkesråd Ivar B. Prestbakmo at eit av måla med prosjektet er ei sterk satsing på kollektivtrafikken. Derfor vil styringsgruppa prioritere å oppretthalde ramma for kollektivtiltaka i Harstadpakken.

  • I 15 år skal det kreves bompenger for Veipakke Harstad. Det kan koste bilistene opp mot 7.000 kroner i året.

Flere nyheter fra Troms og Finnmark