Ministtar heahpana dáruiduhttima geažil
Kultur- ja ovttadássásašvuođaministtar Lubna Jaffery dadjá iežas heahpanit dáruiduhttima geažil.
– Munnje bođii dakkár heahpatvuođadovdu go gehččen «Ellos eatnu»-filmma. Ii fal danne go mu váhnemat, geat bohte Pakistánas Norgii 1970-vuođđalogus, dahje mun leat dahkan maidige sápmelaččaid vuostá, čilge Jaffery.
Son lohká iežas norgalažžan ja ráđđehuslahttun gullat eanetlohkoálbmogii.
Danne lea su ovddasvástádus leat mielde dálkkodeamen daid bákčasiid maid dáruiduhttin lea dagahan sápmelaččaide.
Ministtar oassálasttii ikte Romssa Riikkaidgaskasaš Filbmariemuid (TIFF) lágidan ságastallamis seanadeami birra.
Jaffery lohká fertet nannet sámi kulturdoaimmaid jus seanadeapmi galggašii lihkostuvvat.
– Mis ferte leat govda sámi dáidda- ja kulturpolitihkka. Sámi dáidda ja kultuvra ollá guhkás. Sámi musihkkabiras lihkostuvvá bures. Máŋga sámi filmma ja TV-ráiddu leat boađi boađi. Dat addá midjiide čiekŋaleappot áddejumi. Lea hirbmat mávssolaš go sámi álbmot ja sámi dáiddárat muitalit muitalusaideaset, lohká Jaffery.