Det er no ein stor leiteaksjon nord på Tromsøya. Politiet leiter etter ein mann som ikkje dukka opp etter å ha gått seg ein tur frå Hamna til Utsikten seint måndag kveld. Han skal ha gått i lysløypa.
Operasjonsleiar Øyvind Gundersen i Troms politidistrikt seier til Nordlys at politiet fekk inn melding om at mannen var sakna like etter klokka 05.00 i dag.
– Leiteaksjonen blei sett i gang like etter 06.30, etter at han var meldt sakna og ikkje kom heim i går, seier operasjonsleiar i Tromsø-politiet, Eirik Kileng til NRK.
Hundar er tatt i bruk i leiteaksjonen på Tromsøya.
Foto: Trygve Andreassen / NRKNo er Røde Kors og Norsk Folkehjelp og hundar sett inn i søket, og politiet kjem også til å fly over området med helikopter. Det blir søkt mellom Stakkevollan og Hamna, spesielt i lysløypa, opplyser politiet. Mannen skal ikkje ha vore veldig godt kjent i dette området.
– Mannen er i god helse og normal fysisk form, og skal også vere iført gode klede, seier Kileng.
Mannen er i slutten av 40-åra, er litt kraftig, litt skjegg og har lite hår på hovudet. Mannen er iført ein grå allvêrsjakke og dongeribukse, og politiet ønsker tips frå folk.
– Vi ønsker tips viss folk har sett nokon som kan passe til dette signalementet, seier Kileng til NRK.
Politiet sitt nummer er 02800.
Luftambulansen bistår i søket etter ein sakna mann i 40-åra.
Foto: Noralf Brandser
