Politiet fortset etterforskinga av dei anmeldte valdtektene på Countryfestivalen i Seljord. Fire kvinner har anmeldt valdtekter, og ein mann i 20-åra er sikta for den eine valdtekten. Han blei sett fri etter avhøyr hos politiet.
I dei tre andre valdtektssakene er gjerningsmannen ukjent.
Les også:
Kvinnene skal ha blitt valdtekne på campingplassen under Countryfestivalen. Den eine valdtekten skjedde natt til fredag, den andre natt til laurdag og dei to siste natt til sundag.
Prøvar å finne DNA-spor
Etterforskningsleiar Kjetil Rakkestad seier at politiet fortsatt ser valdtektene som fire separate saker, og håpar å oppklare desse i løpet av kort tid.
– Vi etterforskar valdtektene vidare. Det blei gjort ein del etterforsking på staden i helga under Countryfestivalen som vi følgjer opp denne veka.
Alle kvinnene er blitt undersøkt på valdtektsmottaket i Skien, og det er sikra prøver.
– Desse prøvene er nå sendt vidare til analyse med tanke på å finne DNA-spor, seier Rakkestad.
Det blir også gjort fleire avhøyr i saka for å prøve å oppklare sakene.