Denne hytta låg ute for snautt 3,6 millionar, men blei selt for nesten ein million meir.
– Det draus inn med spørsmål, og folk lasta ned prospektet i eit køyr, seier meklar Tom Didrik Eriksen. Han sette opp to ekstra visingar fordi interessa var så stor.
Ikkje skremt av enkel standard
Han var spent då han la ut annonsen. Hytta ligg solrikt og usjenert til, har eiga brygge og fem soverom. Men den ligg på ei øy, og har ikkje bilveg fram og ikkje innlagt vatn.
Det såg altså ikkje ut til å skremme folk. Hytta ligg også i Porsgrunn kommune, eit område som kjem langt ned på lista over dei mest populære kystområda.
– Hadde denne hytta lege på Tjøme, hadde ho truleg kosta det tredobelte, seier Eriksen.
Heit hyttemarknad
Denne vinteren var travel i hyttemarknaden. Det tok over 20 dagar kortare å få selt ei hytte, og prisane auka med over fem prosent.
– Me trur det blir ein heit sommar i hyttemarknaden på kysten også, mykje tyder på det, seier Barbro Rasmussen, dagleg leiar i Eiendomsmegler 1 Telemark.
Det er fleire grunnar til at interessa for hytter er stor. Den norsk krona står svakare i utlandet, og renta er framleis låg. Eit element som no får meir å sei, er at stadig fleire bur i byar og kanskje i relativt små leilegheiter.
– Det urbane livet stimulerer lengten etter ei hytte med natur og utsikt.
Rasmussen legg til at mange no har hytte både på fjellet og ved kysten.