Kommunestyret i Bamble sa torsdag kveld nei til Bypakke Grenland med stort fleirtal. Bystyret i Skien har sagt ja til bypakkka, og det same gjorde kommunestyret i Siljan.
Bystyret i Porsgrunn har tidlegare sagt ja til bypakka.
Fylkestinget har også sagt ja til Bypakke Grenland. Fylkesordførar Terje Riis-Johansen er ikkje overraska over at det blei nei i Bamble.
– Vi har tatt høgde for dette, seier Riis-Johansen i Telemarksendinga.
Han seier at arbeidet med Bypakke Grenland går vidare.
– Dei tiltaka som var planlagt i Bamble vil bli tatt ut av planen, seier Riis-Johansen.
Startar med ein gong
Arbeidet med Bypakke Grenland vil no bli konsentrert rundt forbetringar med vegar, gang- og sykkelstiar, trafikktryggleik og miljøtiltak i Skien, Porsgrunn og Siljan.
Samferdselsjef i fylkeskommunen Bjørg Hilde Herfindal seier til Porsgrunns Dagblad at arbeidet med å planlegge gjennomføringa av Bypakke Grenland startar med ein gong.
Ho trur arbeidet i Lillelvkrysset i Porsgrunn og ved Skyggestein i Skien startar samtidig.
Målet er å sette spaden i jorda ved årskiftet 2014-2015.