Hopp til innhold

Tre menn sikta for brannstifting

Politiet har sikta tre menn i samband med brannane i Skien sentrum fredag ettermiddag.

Brann i Skien sentrum

Bygningen i Schwachsgate fekk store skader under brannen fredag.

Foto: Bo Lilledal Andersen / NRK

Dei tre blei arrestert seint fredag kveld, mistenkte for å ha sett fyr både på den gamle prestebustaden i Lundegata, og på ein bygning i Schwachsgate, seier politiadvokat Andreas Haugen i Sør-aust politidistrikt.

Det var tips frå publikum som gjorde at politiet valde å arrestere mennene, som er i 30- og 40-åra. Dei mistenkte blir avhøyrde i løpet av dagen, seier Andreas Haugen.

Mistenker at brannane i Skien er påsett

Det var klokka 1530 fredag ettermiddag politiet fekk melding om brann i den gamle prestegarden i Lundegata i Skien sentrum. Godt arbeid av Skien brannvesen sørga for at ein av få bygningar som overlevde den store bybrannen i Skien i 1877, berre fekk mindre skader.

Skien gamle prestegard

Den verneverdige prestegarden frå 1870-talet fekk mindre skader

Foto: Anniken Sanna / NRK

Mens brannvesenet dreiv sløkkingsarbeid i Lundegata blei det melt om ein ny brann 200 meter unna. Brannen i det ubebudde huset i Schwachsgate blei meir omfattande, og fredag ettermiddag var store deler av Skien sentrum røyklagt. Arbeidet med å sløkke brannen gjekk føre seg til langt på natt.

Etterforskinga held fram

Kriminalteknikarar arbeider no for å finne brannårsakene. Det blir og gjennomført taktisk etterforsking, seier politiadvokat Andreas Haugen.

Når dei sikta har forklart seg, tek politiet stilling til om skal be om at mennene blir varetektsfengsla.

Flere nyheter fra NRK Vestfold og Telemark