– Hadde eg hatt ein sykkel med lågare styre så kunne det fått fatale følgjer, seier Nils Martin Brandvik.
Han fekk stygge skader etter at han, i full fart på EL-sykkelen sin, trefte ein bom i Porsgrunn. Brandvik jobbar i NRK og var på veg heim i nattemørket etter ei fullført kveldsvakt. Han hadde ei fart på omkring 25 kilometer i timen da det smalt.
– Eg skimta noko gult da eg var ein halv meter ifrå den, også var det bråstopp, seier Brandvik.
Sjå meir om den dramatiske hendinga i videovindauget øvst i saka. Der kan du blant anna sjå kor vanskeleg det var å sjå bommen i nattemørket.
- Les også:
LED-lys
– Det må jo leggjast til rette for gåande og syklande når slike bommar vert sett opp. Det må gjerast noko med, eller så mistar kommunen truverda si, sa leiar i Trygg Trafikk Telemark, Brita Straume, da ho fekk sjå videoen frå NRK.
NRK tok også med videoen til Porsgrunn kommune. Kjell Myren i trafikketaten vart overraska da han skjønte kor vanskeleg det var å sjå bommen.
– Her er det jo montert på gode refleksar, så eg er veldig overraska over at den er så vanskeleg å sjå, seier Myren.
I etterkant av ulykka har kommunen montert LED-lys på bommen. Dei skal lyse til ei kvar tid og hindre at fleire personar skal ha uheldige samanstøyt med det gule metallrøyret.