– I dette tilfellet har me bestemt at han ikkje mistar førarkortet, blant anna fordi det er uoversiktleg på staden, seier operasjonsleiar i Sør-Aust politidistrikt, Ole Jørgen Lund.
Det var måndag ettermiddag at ein bil hamna utfor rådhustrappa i Porsgrunn. Føraren var ein mann i 80-åra som var på veg til tannlegen. Han vart meldt for hendinga, og må stå økonomisk til ansvar for skadane han påførte granittsteinen i trappa.
– Føraren blir alltid erstatningspliktig når slikt skjer, seier Torbjørn Krogstad.
Krogstad er leiar for kommunalteknisk i Porsgrunn. Han er ikkje einig i at det er uoversiktleg ved rådhustrappa, og trur ikkje eit skilt vil hindre folk i å køyre utfor.
– Kva type skilt skulle det vore? Me kan jo ikkje setje opp eit skilt som seier det er forbode å svinge inn mot trappa, for da vil jo nokon tru at det faktisk går ein veg der, seier Krogstad.
Innspel frå politiet
– Det har jo vore fleire hendingar i denne trappa, og det kunne nok vore ein idé å setje opp eit skilt, og det er eit innspel me har gjeve til kommunen, seier Lund.
Krogstad meiner at alt ansvaret ligg på føraren av bilen når slikt skjer, og at om dei ikkje ser at det er ei trapp der, så ser dei ikkje at det er noko skilt som åtvarar mot trappa heller. Krogstad kjenner heller ikkje til innspelet frå politiet.
– Me er jo stadig i møter med politiet, men eg kjenner ikkje til noko spesifikt innspel frå dei i dette tilfellet, seier Krogstad.