Mora til Odd-spelar Frode Johnsen valde å ta pennen fatt etter å ha mista sonen Dan i ei tragisk ulykke for snart to år sidan.
Resultatet blei eit teikneseriehefte om fotballaget Odd, og nå er ho i gang med årets sesong. Første stripe ut er frå kampen Odd vant mot Molde tidlegare denne veka.
Fekk hjelp i sorga
Liv Enger sit i stua heime på garden i Skien. Der teikna ho i fjor 34 striper om laget i hjartet sitt.
– Hausten 2013 i august mista eg Dan. Og då trengde eg rett og slett å kome ut av sorga, seier Enger.
Då starta ho å teikne på stripene om DEF og Disiplene.
– Eg synest sjølv det er litt rart at det blei humor, men då greidde eg å fokusere på det og gjekk inn i bobla mi og hadde det artig. Men då eg kom ut av den, fekk eg sorga tilbake.
Men det hjelpte for Liv Enger å vere ein del av Odde-familien.
– Det har betydd veldig mykje.
Les også:
Drakta til Odd-trenaren
Og namnet på teikneserien kom heilt naturleg.
– Eg såg bokstavane D, E og F på drakta til Dag-Eilev Fagermo. Og då tenkte eg det må bli DEF og Disiplene.
Då starta Liv Enger med å sjå på bilete, og følte at ho fann ei form på teikneseriestripene.
– Og då berre rulla ballen vidare, seier Enger.
Sjølv om ho i starten ikkje trudde at det ville halde til eit heilt hefte.
Les også:
Er på innsida i klubben
På Skagerak Arena set dei stor pris på Liv sine kunstneriske evner. Å bli ein teikneserieklubb synest son og Odd-spelar Frode Johnsen er berre gøy.
– Eg synest nokon av figurane er veldig gode. Og eg liknar vel på meg sjølv eg også, stort sett, seier Johnsen.
Trenar for Odd Dag-Eilev Fagermo. Han kjenner seg godt igjen i teikneserien.
– Ho er såpass mykje på innsida i klubben og tett på Odd. Liv både skjønar, forstår og veit kva som går føre seg, seier Fagermo.
Og teikneserien får du kjøpt i Svindal-kiosken. Kiosken på Skotfoss og i Odd-butikken.