Avtalen gjelder for kommunane Skien, Porsgrunn og Siljan og Telemark fylkeskommune.
– Dette dekker behovet for å behalde satsinga på eit godt og billig kollektivtilbod i Grenland, seier fylkesordførar Sven Tore Løkslid.
Positiv til satsing i Grenland
Fylkesordføraren fortel at Grenland fekk eit av dei billigaste busstilboda i Noreg med «Bussløftet» i 2014. Månadskortet blei sett ned frå 700 til 400 kroner, det blei innført ti minuttar frekvens på linjene i byen i rushtida og enkelte ruter blei utvida.
Sidan har passasjerveksten økt jamt. Siste halvår i 2016 har den gjennomsnittlege veksten vore på 18,1 prosent.
– Det er positivt at Grenland vil jobbe for at fleire reiser med kollektivtransport, syklar eller går, seier samferdselsminister Ketil Solvik-Olsen i ei pressemelding frå regjeringa.
Søkte om ein halv milliard
Nå får Grenland 250,2 millionar kroner til å satse på meir kollektivtransport. Belønningsmidlene blir gitt på bakgrunn av måla som er sett for Bypakke Grenland.
Staten bidrar med 70,2 millionar kroner i 2017, og 60 millionar kroner årleg i perioden 2018 til 2020 så lenge måla i avtalen blir oppnådd.
– Vi søkte om 500 millionar, men fekk halvparten. Dette viser at vi har enda større ambisjonar, seier Løkslid.
Grenland hadde belønningsavtale også for perioden 2013–2016 og tok imot i denne perioden 240 millionar kroner i belønningsmidler frå staten.
Fekk nei til å bruke bompengar
Løkslid seier at det blei søkt Samferdsledepartementet om å få bruke delar av midlane frå bompengeinnkrevjinga til å subsidiere kollektivtilbodet i Grenland.
Men fekk nei av Samferdsledepartementet.
– Det var eitt alternativ. No slepp vi det. Men vi skal vere så ærlege å seie at vi bruka det som eit argument då vi forhandla om ei ny belønningsavtale.