Neste sommar kan denne vakre øya bli ein del av ein Nasjonalpark i skjergarden. To slike nasjonalparkar er under arbeid. Ein på Telemarkskysten og ein på Sørlandskysten.
– Med nasjonalparkar følgjer mange restriksjonar, men også betra vedlikehald, seier prosjektleiar Morten Johannessen. Han har tru på at planen skal få tilslutning hos Kongen i statsråd.
Omfattande sakshandsaming
15 forskjellige utgreiingar er gjort. Dei viktigaste har vore kartlegging av bruken i dag, og konsekvensane ein nasjonalpark får for bruk av Jomfruland og Stråholmen i framtida.
Protestane har vore mange og heftige, men no meiner Johannessen at planen bør kunne passere.
Både øyfolket og hyttefolket har fått gjennomslag for viktige saker. Blant anna er gardsbruk og hytter på dei to øyane er tatt ut av verneplanen.
Og det er tatt omsyn til rekefiske på utsida av Jomfruland.
Politikarane sin tur
Formannskapet i Kragerø får høyringsutkastet i påskeveka, og 16. april er det kommunestyret sin tur.
Passerer planen det politiske nivået, skal den ut på høyring til interesseorganisasjonar og enkeltpersonar.
Deretter er det Miljødirektoratet og Miljøverndepartementet sin tur, og til slutt Kongen i statsråd, det vil sei regjeringa.
Og då kan Jomfruland Nasjonalpark vera ein realitet sommaren 2016.
Mange har meint mykje
Prosjektleiar Morten Johannessen hjå fylkesmannen meiner at forslaget er godt forankra i lokalsamfunnet.
– Nasjonalparkstempelet vil gje langsiktig forvalting, og fleire ressursar til vedlikehald og utvikling, meiner Johannessen.
Det handlar om å sikre øyriket betre for etterkomarar.
Lokal vetorett
Når det gjeld dei to nasjonalparkplanane, har lokaldemokratiet full styringsrett, og kan ikkje bli overkøyrde av staten.
Kragerø, Grimstad, Arendal og Tvedestrand har vetorett
Både når det gjeld Jomfruland Nasjonalpark, som går frå Bamble til Risør, og Raet Nasjonalpark, frå Grimstad, Arendal og til Tvedestrand, har kommunane vetorett.
Bakgrunnen er at forslaget om å få til nasjonalpark kjem etter lokalt initiativ. Tidlegare har staten trekt opp linjene og peika ut dei aktuelle områda.
Først skal kommunane vurdere forslaget som blir sendt ut til høyring, og i neste omgang skal kommunen realitetsbehandle planen. For Kragerø sin del kjem den politiske behandlinga til hausten etter høyringa og når verneforslaget er justert i høve til høyringsuttalene.