– Det er veldig skremmande. Det bur mange eldre i området her, og det er sjeldan noko bråk. Dette synest vi ikkje var noko koseleg.
82 år gamle Astrid Johansen bur i nabohuset til firemannsbustaden på Vallermyrene i Porsgrunn der det vart funne sprengstoff og ein handgranat søndag kveld. Politiet rykte ut til leilegheita etter melding om husbråk da dei oppdaga eksplosiva.
– Det har vore eit oppstyr i tre døgn med mange politifolk og hundar. Både politibil, brannbil og sjukebil har stått utanfor, seier Johansen.
- Les også: Gammal granat funnet på gjenbruksstasjon
– Evig takksam
Naboane som bur i firemannsbustaden, vart evakuerte etter funnet. NRK har vore i kontakt med to av naboane, som ikkje vil stå fram med namn.
Den eine naboen seier han er evig takksam for at nokon ringde og melde frå om husbråket.
– Dette hadde heilt sikkert smolle skikkeleg ein eller annan gong. Det er ikkje så hyggjeleg å tenkje på at «heimesnikkarar» handterer så farlege stoff.
Visste ikkje kva som skjedde
Astrid Johansen seier at det berre var dei evakuerte naboane som fekk veta kva som skjedde. Sjølv måtte ho lesa i avisa at det var snakk om eksplosiv.
– Vi skjønte ikkje kva som hadde skjedd. Eg trudde det var eit mord. Dei som budde i same hus vart evakuerte. Men ingen kom og snakka med oss.
Enormt skadepotensial
Den sikta mannen er varetektsfengsla i to veker med brev- og besøksforbod.
I fengslingskjennelsen står det at sprengstoffet som er funne har svært stor sprengkraft og kan vera ustabilt.
Ifølgje Porsgrunns Dagblad skal det vera snakk om kjemikaliar til sprengstoffet TATP, men dette vil ikkje politiet stadfeste.
– Vi vil ikkje gå inn på kva type sprengstoff det er før vi har kome vidare i etterforskinga. Vi må fyrst avklare kva motiv den sikta hadde for å oppbevare dette, seier politiadvokat Julie Marie Sandvik.
Tidlegare domfelt
Sandvik fortel at den sikta har forklart i avhøyr at han har hatt kjemikaliar og sprengstoff som ein rein hobby. Han seier han har brukt dette i skogen, og har aldri laga noko for å skade andre.
Den sikta har erkjent straffskuld for forholdet. Mannen skal òg ha vore domfelt tidlegare for omgang med sprengstoff, og blir av kjelder skildra som interessert i våpen.
Politiet arbeider vidare med å finne ut om mannen er ein del av eit nettverk som oppbevarer og lagar ulovleg sprengstoff.