Det melder Statkraft på Dalen i ei pressemelding,
Den siste tida har det kome store mengder nedbør i Telemark, og det er venta store mengder nedbør dei komande dagane.
Fleire av Statkraft sine vassmagasin nærmar seg fulle. Og Statkraft har nå utnytta magasinkapasiteten for å dempe flaumtoppen.
Vassføringa vil stige
Det er venta at vassføringa vil stige i dei elvane Statkraft regulerer utover i veka.
– Vi har derfor i fleire dagar jobba med å tappe magasina for å avgrense konsekvensane for ålmenta. Statkraft håpar at dei som er råka kan forstå situasjonen, seier regiondirektør Rolf Normann i Statkraft Region Øst.
Tilsiget til elvar og vassdrag er venta å gå tilbake i løpet av komande fredag.
Produksjonssjef Halvor Haugland seier at Statkraft har tappa vatn frå vassmagasina i Kjela, Songa og Totak for å ha ledig magasinkapasitet til nedbøren som er meldt vil kome dei næraste dagane.
– Det har vi gjort for å hindre dei største flaumskadane nedover i vassdraget, seier Haugland til NRK Telemark.
Hyllandsfossen går for fullt
Hyllandsfossen i Vinje går nå for fullt med 50 kubikk i sekundet for å tappe vatn frå Totak. Vinjevatn blir tappa med 100 kubikk i sekundet.
– Vassføringa gjennom Dalen er no oppe i 250 kubikk i sekundet i den nedre delen av Tokkeåi. Men vi håpar å unngå skadenivå på Dalen, seier Haugland.
Statkraft har førebels ein del å gå på i vassmagasina i Bandak og Flåvatn og forsøker å kontrollere vassføringa vidare nedover i vassdraget i Eidselva.