Løyte gard i Drangedal er ei familiebedrift som sel produkta sine i eit lite landhandleri på garden.
– Her er det masse godt, seier Monica Gullaksen ved Løyte Gård.
Les også:
I låven på garden i Drangedal har sambuar og odelsgut Jørgen Løyte innreia eit lite landhandleri der dei sel eigne produkt frå garden og lokalprodusert mat frå andre lokalprodusentar i bygda. Og nå før jul må familien stå på litt ekstra.
– Det er den travlaste tida i året. Alle vil ha julematen så tett opp mot jul som mogleg, seier Gullaksen.
Landhandleriet byr på ferske gardsegg, sylte, lammerull, pinnekjøt og mykje meir i kjølediskane. Her blir du ekspedert over disk, og kan sette deg ned og ta ein kopp med kaffi.
Må følgje med heile tida
På låven har Jørgen Løyte innreia eit eige tørkerom for kjøtt. Her er tak og veggar dekt med pinnekjøt, skinker og rull som skal bli julemat.
– Her er det mykje julemat. Spekeskinke og fenalår lagar vi heile året, men pinnekjøtet skal ut nå før jul, seier Løyte.
Og på Løyte gard lagar dei pinnekjøtet på gamlemåten av lam frå eigen gard.
– Eg må følgje med heile tida. Det skal tørke, men ikkje for fort og ikkje for seint, seier Løyte.
Lokalprodusert mat kostar gjerne litt meir enn det du får kjøpt i butikken. Monica Gullaksen fortel at dei forsøker å ikkje legge seg for høgt i pris.
– Men vi har kontakten med dyra heile vegen, og føler vi kan forsvare kvaliteten og prisen.
Tørrsalta og røyka på gamle måten
Heile familien er engasjert i matproduksjonen på garden. Grisane går heime på garden og blir blant anna fôra med eple. Sauene går på fjellbeite i Fyresdal.
Mor Wenke Løyte vakuumpakkar bacon, mens far Olav Løyte står ved skjeremaskina og skjærer bacon.
– Det er tørrsalta og røyka på gamlemåten her på garden, seier Løyte.
Og Olav Løyte meiner det smakar betre og har ein annan struktur på kjøtet enn det du får kjøpt i butikken.
– Dei grisane som går ute får ein heilt annan struktur, og tørrsalting og røyking gjer susen, seier Løyte.