Hopp til innhold

Lågkarbo til Sørpolen

Elevar i 6. klasse fekk smake den næringsrike maten som fekk Roald Amundsen først til Sørpolen.

Råkarbo til Sørpolen

Malene Rodenbeck smaker på maten Roald Amundsen åt på Sørpolekspedisjonen.

Foto: Ragnar Lurås / NRK

Roald Amundsen sin ekspedisjon til Sørpolen for hundre år sidan brukte 99 dagar på turen fram og tilbake. Dei starta ved iskanten på havnivå og klatra 3300 meter opp til platået der polpunktet ligg.

Det spesielle med Amundsen-ekspedisjonen var at alle dei fem mennene som var med på turen hadde nesten den same vekta då dei kom tilbake til Fram etter den strabasiøse turen med ski og hundeslede i tretti kuldegrader.

Artikkelen held fram under biletet.

Amundsens havrekjeks

Roald Amundsen hadde sin eigen oppskrift for havrekjeks som elevane ved Klyve barneskole fekk smake på.

Foto: Ragnar Lurås / NRK

Polaruke i Skien

Under Polaruka i Skien får elevar i barneskulen sjå film og høyre om Sørpolekspedisjonen til Roald Amundsen 1910–1912. Opplegget er utarbeida av Norsk Skieventyr og basert på dagbøkene til dei ekspedisjonsmedlemmane frå Skien som var med.

Hjalmar Johansen frå Skien, som var med Fridtjof Nansen mot Nordpolen, Olav Bjaaland frå Morgedal var ein god skiløpar og skimakar og den minst kjente er Halvardus Christensen som mønstra på som alt mogleg mann og seinare blei maskinist på Fram.

Spesielt kosthald

Med temperaturar ned mot 50 grader og tungt slit under ekstreme forhold krevjast det også eit spesielt kosthald. Kanskje var også det noko av årsaka til at Amundsens menn hadde gått ned minimalt i vekt etter den strabasiøse turen til Sørpolen og tilbake igjen.

Konkurrenten Robert Falcon Scott brukte også pemmikan på sin ekspedisjon. Han nådde Sørpolen etter Amundsen som kjent, men alle ekspedisjonsmedlemmane omkom på turen tilbake.

Elevane ved Klyve Barneskole fekk smake Roald Amundsen sitt spesielle kosthald utvikla for å overleve under polare forhold. Dei fekk servert kjøttsuppe, Roald Amundsen sine havrekjeks og pemmikan.

Artikkelen held fram under biletet.

Roald Amundsen mat

Havrekjeks, kjøttsuppe og pemmikan stod på menyen til Roald Amundsen. Ikkje alt falt i smak for elevane ved Klyve barneskole.

Foto: Ragnar Lurås / NRK

Pemmikan er lågkarbo

– Pemmikan er lågkarbo, seier Tarjei Gjelstad ved Norsk Skieventyr. Han fortel at Roald Amundsen lærte oppskrifta av inuittane mens han var på Grønland.

Innholdet består av 40 prosent smør eller feitt, 40 prosent finhakka tørka kjøtt og 20 prosent tørka frukt og nøtter. Av denne blandinga kan det lagast små runde ballar med høgt næringsinnhald som kan lagrast lenge.

– Det smaker feitt, seier Malene Rodenbeck.

– Den er smøraktig, seier Martine Evensen.

– Den er spesiell, seier Ana-Milana Cvetkovic.

Amundsens havrekjeks

Amundsens lågkarbo falt ikkje heilt i smak. Men det gjorde derimot Amundsen sine havrekjeks. Den er også laga på ein spesiell måte for å kunne lagrast lenge.

– Den er god. Smaker som havrekjeks, seier Benedicte Andreassen.

Også kjøttsuppa Amundsen og hans menn lagde under Sørpolekspedisjonen smakte.

I jubileumsåret for Sørpolekspedisjonen til Roald Amundsen er det 15 ekspedisjonar som skal gjennomføre turen til Sørpolen.