Ku-protest mot Listhaug

Hopp til innhold

Om lag halvparten av dei som stilte ut i fjor vil boikotte ku-utstillinga. Også geiteutstillinga blir redusert.

Det seier initiativtakar Ottar Flatland i kuklubben i Seljord.

– Vi har lagt vekt på at det ikkje skal ramme Dyrsku'n, slik at det skal bli utriveleg der, seier Flatland.

Her kan du lese meir:

Færre husdyr til bedømming

Difor er boikotten avgrensa til husdyra som skal mønstrast for bedømming på Dyrsku'n.

– Og her har vi hatt ganske god respons frå dei som skal stille ut. Så det blir vesentleg færre kyr og geiter som blir stilt ut i år.

– Trur du dette blir ei markering som Listhaug vil legge merke til?

– No er ikkje landbruksministeren kjent for verken å høyre på bøndene, eller ta noko særleg signal. Men visst ho vil sjå, så er det klart ho vil legge merke til dette, seier Flatland.

Kuklubben i Seljord har teke kontakt med dei som stilte ut husdyr på Dyrsku'n tidlegare år. Og blant dei har om lag halvparten gitt tilbakemelding om at dei ikkje vil stille ut husdyr i år.

– Men om det er nokon som vil stille med fleire husdyr for å kompensere for dette, har ikkje vi oversikt over, seier Flatland.

Vil ikkje ramme ungdomen

Initiativtakarane til boikotten ønskjer ikkje å ramme kalveutstillinga eller ungdomsmønstringa på Dyrsku'n. Og oppmodar bøndene til å stille ut husdyr her.

– Når det gjeld geiter er det gjerne barna som stiller ut, og dei vil vi gjerne skal vere der, seier Flatland.

Når det gjeld andre som stiller ut geiter, er oppmoding at dei skal redusere utstilte geiter til ein kvote på fem dyr.

– Men her veit eg at det berre er mønstra 18 geiter i år, seier Flatland.