Hekstisk natt for brannvesenet

Hektisk kveld og natt for brannvesenet. Lynet slo ut system også hos brannvesenet.

Tor Holt, Skien Brannvesen

Tor Holt ved Skien Brannvesen fortel om ei hektisk natt for brannvesenet.

Foto: Gry Eirin Skjeldbred / NRK

Det har vore ein særdeles travel og hektisk natt for brannvesenet. Dei kan ikkje hugse sist det var slikt vêr.

Mange brannmannskap har vore på jobb sidan klokka 17 torsdag. Nokre heilt sidan torsdag morgon. Og arbeidet berre held fram utover formiddagen i fredag.

Les også:

Hektisk natt

Framleis er det mykje å gjere etter uvêret i går kveld og natt. På alarmsentralen hos brannvesenet i Skien har det vore dobbelt bemanning gjennom natta.

– Det har vore hektisk gjennom heile natta, mange automatiske brannmeldingar som ein følgje av uvêret, seier Tor Holt i Skien Brannvesen.

Det har vore to kraftige husbrannar, ein i Porsgrunn og ein i Skien.

– Det er alvorleg i vår målestokk, og så har vi hatt nokre mindre branntilløp, seier Holt.

Lynet slo ut system

Brannvesenet i heile Telemark blir styrt frå alarmsentralen hos brannvesenet i Skien.

Då er det best at alt fungerer, men sjølv ikkje brannvesenet slapp unna uvêret sine herjingar, fortel branninspektør Henrik Brokke.

– Vi opplevde at noko av vårt utstyr også blei forstyrra av torevêret. Og det same skjedde med noko av utstyret ute i kommunane.

Men brannvesenet har sikra seg med fleire ulike system. Og det førte til at utstyret var oppe å gjekk heile tida.

Og når det er ekstremvêr hender det også at brannvesenet blir råka.

– At lynet slår ut system er noko av det som er vanskelegast å verne seg mot, seier Brokke.