Foreininga for kjønns- og seksualitetsmangfald, FRI, fryktar at dei kan bli eit mål for nynazistar som opererer i Telemark.
– Vi er bekymra for det som ser ut til å vere ei nynazistisk gruppe som vi veit har hatt aksjonar mot våre søsterorganisasjonar i Sverige, og som gjekk til åtak mot ein mann i Finland som døde nå i helga, seier Ingvild Endestad, leiar i FRI.
Det var TA og Dagbladet som først skreiv om organisasjonen Den nordiske motstandsbevegelsen, som arrangerte treningssamling under Dyrskuhelga i førre veke.
Vil kunne forsvare seg
Organisasjonens leiar Haakon Forwald fortel til TA at i dagens samfunn er det vettig å kunne forsvare seg.
– Utover det så er dei personane som var til stades på helgas arrangement i Telemark våre aktivistar i vår organisasjon og våre meiningsmotstandarar har ein generell låg terskel for valdsbruk. Da er det også lurt å kunne forsvare seg, sa Forwald til TA torsdag.
NRK har forsøkt å komme i kontakt med Den nordiske motstandsbevegelsen i dag, men har ikkje lukkast med det.
Fryktar at dei er målet
– Denne gruppa har aktivt uttalt at vi er målet for deira aksjonar, seier Endestad.
FRI viser til vald i Finland skjedde under ein demonstrasjon. Politiet oppfattar det slik at 28-åringen som døde blei angripen fordi han spytta mot demonstrantane.
– Det er den same organisasjonen si avdeling i Noreg som hadde treningsleir i Telemark. Det er ingen tvil om dei er valdelege, og at dei trenar seg til kamp, seier Endestad.
FRI etterlyser handling frå politiets side og har kontakta Politiets tryggingsteneste. Vest-Telemark Blad skriv at politiet var orientert om arrangementet i grendehuset.
Politiet vil ha oversikt
Regionlensmann i Midt-Telemark og Vest-Telemark, Sigrid Dahl seier det er bra at folk melder frå om at dei er bekymra.
– Det hjelper oss til å halde oversikt over kva som går føre seg.
I denne saka uttalar Dahl seg på vegner av det lokale politiet som skal handtere straffbare forhold dersom det er aktuelt.
– I utgangspunktet tenkjer vi at det er ytrings- og forsamlingsfridom her i landet.
– Korleis ser politiet på at denne nynazistiske gruppa samlar seg til ein treningsleir i Telemark?
– Politiet er bekymra for alle typar radikalisering og ekstremisme som viser og uttrykker at dei ønskjer å bruke vald, så det følgjer vi med på.
Leigde huset for familien
Leiar i Grendelaget i Vefall-Brekke, Lene Braaten seier til NRK at det var ein privatperson frå distriktet som leigde grendehuset.
– Han sa at det skulle brukast til besøk av familien i dyrskuhelga. Og styret trudde det blei brukt til det som var føremålet med leiga av huset. Styret var ikkje kjent med bruken før det stod omtalt i media på torsdag. seier Braaten.