– Det aller fyrste eg tenkte, var at eg håpar eg ikkje døyr, seier Janne Haugland.
Det vart ein dramatisk tur for henne og dei fem andre som krasja inn i ein butikk på Nordagutu tidleg laurdagsmorgon. Fem av dei seks brukte sikkerheitsbelte, og kom heldigvis kom frå det med mindre skadar.
– Det var skaresnø i botnen av den bratte skråninga som redda bilen frå å velte og fly sidelengs inn i jokerbutikken. Så det var vanvitig heldig, seier Kristian Skogrand Kigen.
Overdramatisert fordi vi er russ
Ungdommane meiner det er tilfeldig at det gjekk så bra som det gjorde, da sjåføren sovna og køyrde ut. Samtidig meiner dei at bilulykker kan skje alle, og at det har blitt ufortent mykje merksemd rundt at dei er russ.
Kasper Sveinsson trur situasjonen ville blitt teken meir på alvor dersom den same ulykka hadde skjedd med nokon andre.
– Eg trur ikkje media ville hatt det same fokuset dersom det for eksempel var eit handballag som hadde krasja, seier han.
Martin Sauar Wad meiner det raskt vart spreidd eit inntrykk av at russen hadde gått på nok ein smell, og at dei var med på å øydeleggje russen sitt rykte.
– Har russen fått eit ufortent dårleg rykte?
– Nei, det er ikkje heilt uforståeleg. Men om det er i den grad som media seier det er, veit eg ikkje om er heilt sant, seier Lyder Svalastog Osland, som sjølv er russ fyrst neste år.
Ungdom betre i trafikken
Blant politifolk har russen eit betre rykte enn før. Øystein Krogstad, distriktsleiar i utrykkingspolitiet, seier at det har skjedd ei haldningsendring blant ungdommen.
– Dei døyr mindre i trafikken og dei blir tekne færre gonger for råkøyring, så dei er blitt betre i trafikken.
– Kva er grunnen til det?
– Dei blir kanskje tuta full med mykje førehandsinformasjon om kor farleg det er å køyre, også tek dei det ad notam. Ungdom tek også førarkortet litt seinare, og da blir dei meir vaksne i hovudet.
Set preg på feiringa
Elevane frå Bø vidaregåande skule seier at ulykka kjem til å prege russefeiringa, men mest på ein positivt måte.
– Vi kjem til å vera forsiktige, og ta ekstra omsyn til sikkerheita, spesielt når vi køyrer, seier Kristian Skogrand Kigen.
Janne Haugland seier ho kjem til å vera svært oppteken av å ha på seg setebelte i bilen.
– Og buksa mi er klipt opp, så eg må jo få nye bukser før eg kan halde fram russefeiringa.