Tidlegare har Statens Naturoppsyn opplyst at det berre har vore ein ulv i Telemark etter nyttår. Denne ulven blei skoten i Nome den 1. februar.
Men no syner nye prøver av ekskrement frå dyra at det har vore minst fire ulike individ i regionen, og at minst to av dyra har vore i Telemark.
I tillegg syner DNA-prøvene at det har vore to dyr i Agder-fylka.
Krev ulvefri region
I dag går bondelaga i Telemark og Agder ut med krav om at styresmaktene set i verk tiltak for å gjere regionen ulvefri.
- Om nødvendig må rovviltnemnda gje fleire fellingsløyve, seier talsmann for bondelaga, Erling Brekkemoen frå Aust-Agder.
Rovviltnemnda for Telemark, Buskerud, Aust-Agder og Vestfold har gjeve fellingsløyve for ein ulv i tillegg til dyret som blei skote i Nome. No trur leiaren i nemnda, Jørund A. Ruud (Ap) at det kan kome fleire løyve.
- Stortinget har sagt at ulven ikkje skal etablere seg i regionen, og det kan godt vere at nemnda gjev løyve til å felle fleire dyr, Ruud.
Fire ulvar uventa
Ruud seier at resultatet av dei siste DNA-prøvene kom uventa.
- Vi visste at det var to dyr i regionen. No er talet dobla, og det syner kor vanskeleg det er å fastslå kor stor rovdyrstamma er.
Analysen syner at det er fire hannulvar som har vore i regionen det siste halvåret.
- Men vi veit at ulvane markerer revir, og det tyder at dei prøver å etablere seg. Dersom det dukkar opp ei ulvetispe får vi ein ny situasjon. Då har vi eit problem i høve til norsk rovdyrpolitikk, seier leiaren i rovviltnemnda.
Krev at SNO tek ansvar
Ulvejakta i Nome blei organisert av frivillige, og på det meste var 100 mann med på jakta.
No krev bondelaga at styresmaktene tek ansvar for å fjerne ulvane.
- Det er urimeleg at husdyrhaldarar og privatfolk skal bruke vinteren til jakt. Det er Statens Naturoppsyn og dei kommunale skadefellingsnemndene sitt ansvar å fjerne dyra, seier Erling Brekkemoen.
