Feirar «Peer Gynt» med seks timars opplesing

– Vi har hatt suksess med høgtlesingskveldar på biblioteket. Også såg eg at dei har strikka heile «Peer Gynt» i Bergen. Dette inspirerte meg til å arrangere opplesinga.

Cecilie Lysell er Ibsen-bibliotekar i Skien. Ho fortel at «Peer Gynt» opphavleg var skrive som eit dramatisk dikt, ikkje som eit teaterstykke.

Difor passar det godt å markere 150-årsjubileet med å lesa verket slik det var skrive i 1867 – ein versjon mange kanskje ikkje kjenner til. Lysell trur ikkje det er gjort liknande opplesingar av Peer Gynt tidlegare.

Deltakarane på opplesinga spenner frå politikarar og næringslivstoppar til journalistar og elevar. Mellom anna skal ordførar i Skien, Hedda Foss Five, lesa Mor Åse sine replikkar i fyrste handling.

Minutt for minutt

– Dette blir litt sånn sakte-tv. Det blir laust og ledig, folk kan koma og gå som dei vil, og vi serverer mat. Men det blir nok ganske intenst å vera til stades dei seks-sju timane arrangementet varar, seier Lysell.

Det var fyrst ni år etter utgjevinga, at diktet vart oppført som teater. Stadig kjem det nye versjonar. Mellom anna har Peer vore gjest i Skavlan, og i ein opera drøymer Peer at han er massemordar.

– På dette arrangementet er det sjølve teksten som er i sentrum.

• Les også: Finst det ei hemmelegheit bak Peer Gynt?

– Eventyrleg og vidløftig

I løpet av arrangementet skal over 50 personar bidra til å framføre diktet. I opningsscena er det sjefredaktør i Telemarksavisa, Ove Mellingen, som skal lesa Peer sine replikkar.

– Dette er eit fabelaktig stykke, som eg synest er enda meir interessant etter å ha budd i Grenland. Mykje er inspirert av Ibsens eigen familie.

Mellingen kallar stykket ein eventyrleg, vidløftig og surrealistisk kombinasjon, som samtidig definerer noko storslege i den norske folkesjela.

– Det er fascinerande at éin av dei to største dramatikarane i verda kjem frå Skien. Han har skrive så mykje allmenngyldig litteratur som det burde blitt gjort meir ut av.

– Den andre er Shakespeare?

– Ja, etter Shakespeare er Ibsen den som blir spela mest på verdas scener.

• Les også: Peer Gynt blir dataspel

Oppdagar nye ting kvar gong

Mellingen fortel at det ligg mange djupner i Ibsens litteratur, og at det går an å lesa Ibsen og få nye ting ut av det kvar gong – noko som seier ein del om storleiken til Ibsen. Sjølv liknar han ikkje på karakteren Peer Gynt.

– Nei. Haha, eg gjer ikkje det. Peer er ein lystløgnar, men samtidig har han ein svær appetitt på opplevingar. Det siste kan eg kanskje kjenne meg att i.

• Les også: Idealet i dag er å leva som Peer Gynt