– Kjempemoro, seier direktør ved Vest-Telemark museum, Dag Rorgemoen.
I haust blir utdanninga i regi Fagskolen Innlandet utvida til også å omfatte fagmiljøet ved Vest-Telemark museum. Endeleg modell for gjennomføring av utdanninga er ennå ikkje klar.
Utdanninga finst nå på Røros og Gjøvik, og kjem i tillegg til Vest-Telemark. Alle desse fagmiljøa vil bestå i den nye modellen.
Treng å bli tatt vare på
Fagskolen Innlandet gjennomfører utdanninga som tidlegare, der enkelte samlingar og delar av utdanninga nå også tar utgangspunkt i fagmiljø og bygningsmasse i Telemark.
– I Norge er det 250 trebygg frå mellomalderen. Halvparten av alle profane, verdslege, trebygg frå mellomalderen ligg i Telemark. Her er det altså snakk om trebygg, kyrkjer er ikkje medrekna, fortel Rorgemoen.
Han meiner det er ei stor bygningsmasse som treng å bli tatt vare på, og det er ein marknad som vil auke i tida som kjem.
– Det vil bli eit veldig stort behov for dei rette folka til å ta vare på det.
For Vest-Telemark museum betyr det mykje å kunne bruke anlegget, og knytte arbeidet til museet opp mot bygging av kompetanse og utøvande handverk.
– Det er der vi vil vere, seier Rorgemoen.
Vil styrke miljøet
Ordførar i Tokke, Jarand Felland, seier at Tokke og Vest-Telemark alt har ein del tilbod om utdanning for ungdom.
– Det nye tilbodet på museet i Eidsborg vil vere med på å styrke det miljøet som alt finst i Tokke og Vest-Telemark.
Felland seier kommunen er veldig glade for å få fagutdanninga for restaurering av verna og verneverdige bygg lagt til kommunen.
– Eg vil rette ein stor takk til dei på museet og fylkeskommunen som har gjort dette mogleg.