Dette kan bli ditt nye betalingskort

Det norske firmaet Zwipe har utvikla ein ny og sikrare måte å bruke betalingskort utan å bruke passord og PIN-kodar.

Det nye betalingskortet som er utvikla i samarbeid med Mastercard, Høgskolen i Telemark og Sparebanken Din, blei presentert for finansmiljøet i London fredag.

Her kan du sjå BBC sin reportasje om betalingskortet.

Brukar fingeravtrykk som identifikasjon

Kim Kristian Humborstad i Zwipe seier det nye kortet brukar fingeravtrykk som identifikasjon og er utvikla i samarbeid med Mastercard.

– Det vi har gjort med Mastercard er å legge inn fingeravtrykksidentifikasjon i overflata på kortet, slik at du kan skru på kortet med å bruke fingeren på med ein knapp som er kopla opp til deg og din identitet, seier Humborstad som er frå Skien.

Han meiner deira teknologi kan samanliknast med ein avansert av og på knapp for betalingskort som erstattar bruken av PIN-kodar.

Humborstad seier at Zwipe har laga ein biometrisk fingeravtrykksmetode som er mykje meir energieffektiv enn det som har vore på marknaden tidlegare.

– Og det gjer at identifikasjon går raskare, og teknologien blir mindre, slik at du kan legge inn heilt andre typar produkt enn det som har vore mogleg til nå, seier Humborstad.

Les også:

• Vil du skal vise fingeren i butikken

Hundre tusen gonger sikrare

Høgskolen i Telemark har vore med på å utvikle den nye teknologien. Kim Kristian er tidlegare student ved høgskolen, og fekk ideen mens han studerte der.

Runar Gundersen arbeider med innovasjon og entreprenørskap ved Høgskolen i Telemark. Han var med på presentasjonen for finansmiljøet i London.

– Dette er ein "once in a life time" sjanse for oss til å vise fram breidda i fagmiljøa på høgskolen. Den er god nok til å få fram ting som kan hevde seg i verdstoppen, seier Gundersen.

– Kva betyr denne teknologien?

– Den er bortimot revolusjonerande. Du får for første gong i verda eit trådlaust betalingskort som ikkje treng eigen straumforsyning, seier Gundersen.

Han viser til at kundane kan gjennomføre bortimot heilt sikre transaksjonar.

– Dette betalingskortet er om lag hundre tusen gonger så sikkert som det du brukar i dag med PIN-kode, seier Gundersen.

– Dette er framtida

Sparebanken Din i Bø har gjennomført eit pilotprosjekt met det nye betalingskortet der fleire serveringsbedrifter og eit femtitals kundar har testa kortet.

– Det er veldig spennande at eit produkt som er funne opp ved Høgskolen i Telemark blir testa ut og godkjent gjennom eit pilotprosjekt i Midt-Telemark, seier forretningsutviklar Morten Danielsen i Sparebanken Din.

Han fortel at banken har fått veldig gode tilbakemeldingar både frå kundane som har brukt betalingskortet og brukarstadene på terminalsida.

– Dei fortel at dette er framtida, seier Danielsen.

Slik ser baksida ut på det nye betalingskortet: