NRK Meny
Normal

Kamilla Mathea (15) går på ordførarskule

Kamilla Mathea Mogstad (15) vil bli politikar. No går ho i lære hjå ordføraren i Skien.

Kamilla Mathea Mogstad og Hedda Foss Five

Kamilla Mathea Mogstad (15) i ordførarlære hjå Hedda Foss Five

Foto: Johs Apold / NRK

15-åringen er elev ved Tveten ungdomsskole i Porsgrunn, og denne veka brukar ho arbeidsveka til å fotfylgje ordføraren i Skien.

– Målet er å bli politikar, og gjerne statsminister. Difor ynskjer eg å fylgje nokon som kan. Det er ekstra stas å få vere med ein kvinneleg politikar som Hedda, som eg set svært høgt, seier den ambisiøse 15-åringen.

– Kvifor freistar eit liv som politikar?

– Det handlar om å syne at kvinner kan like mykje som menn. Og så er det viktig å vere ein uredd politikar.

– Har lært å smile

Kamilla Mathea Mogstad

Kamilla Mathea Mogstad er 15 år, og elev ved Tveten ungdomsskole i Porsgrunn.

Foto: Johs Apold / NRK

Arbeidsveka starta på rådhuset i Skien presis klokka åtte i dag. Deretter var politikar-lærlingen i møte med organisasjonen Redd Barna. Skien er ein av ti byar der organisasjonen i dag sparkar i gang ein nasjonal kampanje mot seksuelle overgrep mot barn.

– Det er ei viktig sak, og ei sak eg brenn for, oppsummerer Kamilla.

– Du har vore lærling i ein dag. Kva har du lært?

– Å smile. Hedda er flink til å smile, ler 15-åringen

– Eg trur ho gjer det medvite, for å tone ned autoriteten som ordførar. Det er lettare for folk å ta kontakt med ein ordførar som smiler!

Hedda starta som 15-åring

Ordførar Hedda Foss Five var sjølv berre 15 år då ho starta i politikken. Seinare har ho gått gradene frå AUF til Skien bystyre, før ho fekk ordførarkjeda etter valet i 2011. Mange trur at karrierevalet var planlagt, men på besøk hjå NRK Telemark mandag ettermiddag avslørar ordføraren at valet var litt tilfeldig.

– Den fyrste tida var det sosiale det viktigaste. Og så var det mange kjekke gutar i AUF. Og ikkje minst: Vi hadde Utøya.

Kamilla Mathea Mogstad og Hedda Foss Five

Kamilla Mathea Mogstad på besøk hjå NRK saman med ordførar Hedda Foss Five.

Foto: Johs Apold / NRK

Møter Telemarksbenken

Læretida til 15 år gamle Kamilla held fram med møte både i formannskapet og i Skien bystyre, før ho tek med seg ordføraren til Oslo for å møte Telemarksbenken på Stortinget. Det blir nokre kveldsmøte, og eit par arrangement der ordføraren skal klippe snorer.

– Eg gler meg. Og eg gler meg aller mest til å møtet på Løvebakken, seier 15 år gamle Kamilla Mathea Mogstad.