Karlsson provosert av norsk taktikk: – Ein protest

På den tredje etappen fekk Heidi Weng gå ut med ei stor luke til Frida Karlsson og Silje Theodorsen, men den luka henta konkurrentane kjapt inn.

Karlsson la seg i tet, men på flata stoppa ho nærast opp, og prøvde å initiere til at nokre av dei to norske kvinnene skulle legge seg i front. Det ville dei ikkje.

No reagerer Karlsson.

– Eg forsøkte å få nokon fram, men det blei eg som gjekk først. Enten så var dei veldig trøytte, eller så var det ein protest, seier Karlsson til NRK.

Silje Theodorsen, som sende lagkamerat Simen Hegstad Krüger ut i leiinga på siste etappe, svarer på kritikken:

– Det blir fort slik, når det er fordel å ligge bak. Eg tenkte at eg måtte spare krefter og dra til på slutten, seier Theodorsen til NRK.

Weng avfeiar at det var snakk om ein protest, for ho hadde nok med å gjennomføre.

Slaktar seg sjølv

Heidi Weng var alt anna enn fornøgd etter at ho måtte sleppe ryggen til Karlsson og Theodorsen opp siste bakken, og dermed sende sistemann Emil Iversen ut heile 7,7 sekund bak Krüger.

– Det er den dårlegaste stafetten eg har gått nokon gang. Det fungerte ikkje, og eg hadde ikkje same tempo som førre helg. Eg er litt skuffa over det, eigentleg, seier Weng til NRK etter etappen.

Ho er ikkje einig med Karlsson om at dei norske kvinnene dreiv med taktikk då dei ikkje gjekk opp i front.

– For min del såg eg ikkje noko poeng i å dra. Det var ikkje noko taktikk frå min side. Eg ville ikkje gå føre, og det var enkelt å gå bak. Eg hadde meir enn nok med det, seier ho.

– Kva er det som gjekk gale?

– Det er litt som frykta. Det kan gå mykje opp og ned, og eg har ikkje treningsgrunnlaget som dei andre har. Eg blir fortare sliten enn normalen, og slik har det vore i heile år, utdjupar Weng.

Ho har slite med sjukdom og skader dette året, og grunngir sprekken med at ho har hatt dårlege treningsperiodar.

– Eg har ikkje klart å presse meg slik eg vil, og då blir ein skuffa når ein pleier å vere med heilt inn på stafettar som dette. Og eg ville jo gi dei andre eit godt utgangspunkt, seier ho.

Dermed vel ho no å stå over neste helgs verdscup i sveitiske Davos.

Monsteretappe

Simen Hegstad Krüger fekk alt i sine hender på sisterunden, medan Emil Iversen hadde ein del sekund å hente inn etter Wengs etappe.

Og Krüger leverte til glans.

– Fy søren, for ein etappe han leverer i dag. Det var vanvitig inspirerande, seier Johaug.

I siste runde la han inn eit enormt rykk opp bakken, og skaffa seg mange meter til svenske Halfvarsson.

– Eg må utnytte mine styrker. Eg likar den tunge dobbeltdansen, og veit at dei to andre som var bak er gode, forklarar Krüger om kvifor han la inn rykket der han gjorde.

Dermed blei det Noreg 2 som stakk av med sigeren.

Sluttduellen stod mellom Iversen og Halfvarsson, og der kom Iversen best ut, og sikra at det blei dobbelt norsk på pallen.

– Det var eit spennande etappe. Krüger var sterk, og eg mangla siste giret for å henge med. Det var irriterande. Eg skulle gjerne ha hengd på han, seier Iversen til NRK.

Overraska over siger

Noregs andrelag hadde ikkje trua på at dei kom til å vinne mot førstelaget på blanda stafett. Det bestod av Lotta Udnes Weng, Mikael Gunnulfsen, Silje Theodorsen og Simen Hegstad Krüger, medan førstelaget stilte med Anne Kjersti Kalvå, Martin Løwstrøm Nyenget, Heidi Weng og Emil Iversen.

– Det var ikkje mange som såg denne kome. Då Arild ringde meg i går, var eg livredd for at eg var reserve, men heldigvis fekk eg starte. Eg har ikkje ord. Dette var heilt utruleg kult å vere med på, seier Gunnulfsen til NRK, som har fått få sjansar i verdscupen.

Silje Theodorsen, som slo Frida Karlsson og Heidi Weng på sin tredjeetappe, trudde ikkje at det ville halde heile vegen inn.

– Fy, fader så morosamt. Eg er stolt av å vere ein del av dette laget. Eg hadde ikkje tort å håpe på siger, seier Theodorsen til NRK.

Krüger følgjer opp:

– Eg trur vi alle vart litt overraska over at vi tok det. Og då smakar det betre, seier han.

Ingen verdscupleiarar

Noreg stilte med to lag på den blanda stafetten på Beitostølen. Der var ingen av verdscupleiarane med, til liks med fleire av dei andre nasjonane.

Fleire lag har pakka ned og sendt heim sine beste utøvarar. Til dømes sende Tyskland heim Carl og Henning, og USA droppa å ta med Jessica Diggins.